Villa-in Everton kaltluang titawp

Premier League season bul ṭan fuh tak Everton kaltluang lai chu Aston Villa lakah a tawp. Villa hian second half-ah goal thum khungin an mikhual hi 3-0 in an lo hneh - tun season league match bikah a vawi khat nan Rafael Benitez-a naute an tlawm.

Inrinni zan Villa Park-a inkhelah hun chanve hma lamin goal a lut lo, inkhel chawhnu lamah boruak a danglam. Matty Cash-a'n minute 66-naah goal hmahruai a khung a, defender Lucas Digne chuan anmahni lama a tih luh bakah Leon Bailey-a'n a khung belh - goal pathum luh hun chhung hi minute kua lek a ni.

Villa midfielder John McGinn chu Michael Keane-a'n a nghawk avangin a lu a hai a, dan angin 'concussion substitute' an siam. Premier League danah match khatah player pathum chauh thlak theih ni mah se, lu bikah intauh/tihpalh vanga buaina nei an awm chuan player pahnih dang a thlak belh theih.

International Football Association Board chuan he dan hi EPL-ah a enchhin lai a ni a, match khatah vawi hnih a hman theih. Team lehlamin concussion substitution an siam a nih chuan, an khingpui lamin player pathum aia tam an thlak ve thei nghal bawk.

Toffees hian hliam vangin keeper Jordan Pickford leh forward Richarlison an chhawr thei lo a, inkhel tura inbuatsaihna lamah captain Seamus Coleman chu a malpui hliamin a inlan thei lo bawk - player pathum hi tun season league match an khelh tawh china an chhawr rim vek an ni.

Asmir Begovic, Alex Iwobi leh Salomon Rondon ten an hmunruak an luah a, keeper Begovic hian Tyrone Mings-a tauh goal tur ṭha takin dang mah se a hnu lamah an tlarhnung a pawp avangin a ṭang zui thei lo.

Brazil international Richarlison aia lut Iwobi chu tlarhma lamah a tal na tawk lo, chak loh chhuanlam an zawng dawn a nih chuan Everton hian an player ṭha inhliam an sawi thei ang, chutih rualin mualneitu Villa lamin chak phu khawpin an khel chhuak.