Atletico chak zo lo; zaninah Barcelona

Inrinni zan La Liga inkhelah Atletico Madrid chuan Athletic Bilbao an mikhual a, goal khung loin an inhnehtawk.

Atletico-in league match nga an khelhah tlawm an la nei lo a, point 11 nen table chung ber an luah mek. Nizan khan Real Madrid leh Valencia an intawng a, team pahnih result a zirin hmahruaitu hi a danglam leh thei ang.

Diego Simeone-a enkawl team tan João Félix chu hnawhchhuah a ni a, Portuguese forward hian khelmualah minute 18 bak hun a hmang hman lo!

Hetihlai hian Barcelona chu zanin dar 12:30-ah hian an inlan ve dawn chauh a, Catalan club hian Granada an mikhual dawn.

Atletico an buai?
Champions League-ah Atletico-in an hneh ngei tura ngaih FC Porto chu goal khung loin an inhnehtawkpui a, league lam an hawi zui - anmahni ang thoa tlawm nei lo Bilbao an mikhual a, chak tura ngaih an ni.

Simeone-a'n Porto laka bul ṭan Félix leh Luis Suárez te bench-ah a dah a, Ángel Correa leh Antoine Griezmann te bul a ṭantir thung. Mahse, Argentine coach beisei angin tlarhma an che lo.

Minute 55-naah Griezmann la chhuakin Suarez a luhtir a, a hnu minute nganaah Correa la chhuakin Félix a luhtir bawk. Mahse, minute 78-na lekah Félix-a'n red card a hmu zui!

Athletic midfielder Unai Vencedor chuan Felix hi a pawt a, Portuguese forward hian a kiuin a nghawk - referee-in yellow card a pe a, lungawi lo taka a ṭawng zui avangin hnawhchhuah a ni.

Bilbao an vanduai
Atletico boss Simeone chuan, "Felix-a chet dan kha midang chet dan ni se hrem an ni lo ang," a ti a, a player hnawhchhuah a nih chungchangah a lawm loh thu a sawi.

Player tam zawk ni chungin Bilbao-in hun ṭha an nei zui a, mahse, an hun ṭha neih an chhawr lo - Iker Muniain hnen aṭanga a ball hmuh ṭha chu Asier Villalibre-a'n khungna remchang nei mah se a chhawr lo.

Kum 19 mi Nico Williams a hmuhnawm a, Spanish winger hi ball a chan apiangin a hlauhawm emaw tih mai tur a ni - mahse, a pawimawh ber goal a keng tel lo a, point khatah lungawi an zir a ṭul.

Bilbao hian match nga an khelh aṭangin tlawm an nei lo a, vawi hnih chakin vawi thum draw result an nei - hetih chhung hian an lamah goal khat chiah a lut a, goal li chiah an khung thung.

Barca inlan hun
Sum lama Barcelona talbuaizia inhrilh nawn a ngai lo a, an khelmual thawnthu pawh beisei angin a danglam hleithei lo. League-ah la tlawm lo mah se an match hnuhnung berah Bayern Munich-in an sawp.

German club hian group stage match-ah Barca hi 3-0 in an sawp a, zanin dar 12:30-ah Granada an mikhual zui dawn - league hi insiamṭhat nan an hman a ṭul.

Barca forward Memphis Depay chuan, "Bayern lakah kan tlawm a, result lawmawm lo tak a ni. Insiamṭhat nan kan hman a ṭul a, title zawng zawng hlawh chhuak tura kan beih theih ka beisei tlat," a ti.

Depay hian Barcelona a pan hnuah match li khelin goal hnih a khung tawh a, assist vawi khat a nei. Mahse, mahni chauha khelh ṭhat a tawk lo a, zaninah chak an duh chuan 'team' anga khelh a ṭul ang.