Season thar beiseitu Andreescu

Bianca Andreescu chuan season thar a thlir a, nakkumah chuan hliam leh harsatna awm loa a inkhelh ve leh theih tawh ngei a ring - January thla a khelh tur Australian Open-ah a hmel hmuh beisei a ni.

Canadian star hian 2019 khan US Open nomawi a chawi a, nomawi lian a chawi hnuah erawh hliam leh harsatna hrang hrang vangin inelna a hmachhawn mumal lo. Tun season bikah phei chuan tournament khelh a nei lo hial.

Kum 20 mi Andreescu chuan, "Ka khup vei lam hliam zai chu a dam tawh, hliam dam hnuah pawh hri leng vangin ka inkhel thei ta lo a ni. Tournament khel lo mah ila in lamah training ṭha takin ka nei reng a ni.

"Tunah hian inkhelh ngai pawh ni se ka inpeih reng tawh, amah erawh chu taksa leh rilru zawng zawng duhthusama inpeih tur chuan hun ka la mamawh. Ka tawnhriat aṭangin engkimah hian dawhthei taka nghah peih hi a pawimawh," a ti.