Champion lai Lille an chak lo

French Ligue 1 champion lai Lille chu Lens mualah 1-0 in an tlawm, goal awmchhum hi Poland midfielder Przemyslaw Frankowski-a'n minute 73-naa Gael Kakuta siamsak a khung a ni.

Inrinni zan inkhel hi second half tir lamah darkar chanve chhung vel a khaihlak. Lens ṭantu tam tak chu khelmualah tlan lutin Lille fans lamah an kal a, buaina chhuak hi a nasat viau hmain police lamin an thunun thei hram.

Franck Haise kaihhruaina hnuaiah Lens hian league match vawi ruk an khelh tawhah tlawm an nei lo, vawi thum chakin an khingpui nen vawi thum bawk an inhnehtawk - pahnihna dinhmun an luah mek.

Champion lai Lille erawh coach thar Jocelyn Gourvennec hnuaiah beisei an phak lo hle, vawi khat chiah chak ni hmel an la hmu; 13-naah awmin goal 12 zet an chhuah tawh a, an nomawi kawl lai an hum dawn lo tih a sawi ngam der tawh.

Nizan khan league hmahruaitu Paris Saint-Germain an inkhel a, Lionel Messi chuan Le Parc des Princes-ah a match hmasa ber a khel tura ngaih a ni, result erawh kan hre hman lo.