Goal khung thiam Ajax

Attacking football an khelh avanga khawvelin a ngaihsan ṭhin Ajax chu tun hma angin ropui tawh lo mah se tun hma ang thoin player ṭha an la chher chhuak tam hle.

Ajax-in tun season-ah bul an ṭan ṭha a, Champions League-a Sporting Lisbon 5-1 zeta an sawp hnuah Eredivisie-ah Cambuur 9-0 in an sawp. Europe club lian hoin transfer bazar huna Dutch club lama an mit an len a nih pawhin a mak lo ang.

Johan Cruyff Arena-a inkhelah hian Ajax tan David Neres-a'n goal hnih a khung a; Jurrien Timber, Steven Berghuis, Noussair Mazraoui, Dusan Tadic, Mohamed Daramy, Sebastien Haller leh Danilo ten goal khat ṭheuh an khung a, Cambuur hi 9-0 in an sawp.

Ajax hi Erik ten Hag-a'n kum 2017 aṭang khan a enkawl ṭan a, Dutch manager hnuaiah hian result an nei ṭha hle. Kum 51 mi Ten Hag pawh hi European club lian hoin lak an tum tawh ṭhin a, tun nipuiah khan Tottenham-in lakchhuah tum mah se an hlawhchham.

Ajax manager Ten Hag hian kum 2016 leh 2019 khan Rinus Michels Award a dawng a, he chawimawina hi Eredivisie-a coach ṭha ber hnena hlan a ni. Kum 2019 khan Ten Hag hi Best FIFA Men's Coach thlannaah palina a ni phak bawk.

Ajax hian rawlthar beiseiawm tak tak an kawl a, chungte chu Dutch player Jurrien Timber (defender), Ryan Gravenberch (midfielder), Devyne Rensch (defender), Brazilian player David Neres (forward), Antony (forward), Mexican midfielder Edson Alvarez leh Moroccan defender Noussair Mazraoui te an ni. Dutch club-in result ṭha an neih zel chuan an player-te hi tun hmaa an tih ṭhin dan angin man to taka an hralh leh mai a rinawm.

Dutch club hian tun season league-ah match nga khel tawhin goal 22 tehmeuh an khung tawh a, goal khat chiah an chhuah. Ten Hag-a hote hian Eredivisie nomawi hi an humhim theih ngei a rinawm a, Champions League-ah pawh Borussia Dortmund, Besiktas leh Sporting Lisbon te nen group khatah awmin knockout stage an thlen theih a beiseiawm hle.