Hun harsa ṭangin Pakistan hi a ding chhuak leh ang - PCB chief

New Zealand-in Pakistan-a inkhelh a him tawk loa an hriat avangin ODI match thum leh T20 match nga khelh tur chu an ṭhulh. Pakistan cricket tan chuan thil pawi tak a ni a, an sum hloh tur piah lamah ram chhunga cricket hmasawnna nasa takin a tiṭhuanawp thei a ni.

PCB chariman Ramiz Raja chuan, "A pawi takzet a ni. Chutihrualin tun hmain hetiang dinhmunah hian kan lo ding tawh a, hun rei tak international match kan khel thei lo. Tun ṭuma hun harsa kan tawrh mek aṭang hian Pakistan hi kan rawn ding chhuak leh dawn," tiin a sawi.

Kar liam ta Zirtawpnia khelh ṭan tura ruahman ODI match thum hi Rawalpindi-a khelh tur a ni a, T20 match nga hi Lahore-a khelh tura ruahman a ni thung. New Zealand sorkarin Pakistan-a inkhelh a him lo tih an hriat avangin Black Caps hi an inhnukdawk. New Zealand Cricket Council chief executive David White chuan, "Sorkar aiawhte nen pawh kan inbia a, ṭhulh mai loh chu tih theih dang a awm lo. Ram pahnih hruaitute telephone hmangin an inbia a, inkhelh chhunzawm ngaihna a awm lo," tiin an dinhmun a sawifiah.

Kum 2009 khan Sri Lanka cricket team chu Lahore-ah Islamist hel pawlin an bei chiam tawh a, police mi paruk leh civil mi pahnihin nunna an chan. New Zealand hian him taka Pakistan chhuahsan an duh avangin an ruahmanna neih ang pawh an puangzar lo.

Pakistan bowler hlui Shoaib Akhtar chuan, "New Zealand hian Pakistan cricket chu an tihlum a ni," tiin na takin a dem. Black Caps an inkhelh duh loh avang hian ram dang tan pawh Pakistan-a inkhelh hi a hlauhawm dawn a, hemi a nih avang hian home match pawh UAE-ah an khelh a ṭul phah hial thei a ni.