Mipuiin Sane an lawm ta

Manchester City aṭanga euro maktaduai 60 bawr vela Bayern Munich zawmtu Leroy Sane-a'n German club tan beisei a pha lo a, season liam ta khan league match 32 khelin goal ruk chauh a khung. Tun season ṭantirh khan Bayern ṭantuten Sane hi an au el a, club hotute leh player-te erawh Sane lamah an ṭang tlat.

Bayern manager Julian Nagelsmann-a'n a hna a thawk ṭha a, Sane khelh dan uluk taka a chik hnuah mual sirah a ṭha tih a hmu chhuak. Germany coach Hansi Flick pawhin Nagelsmann-a hmuhchhuah hi pawmin Sane hi mualsirah a chhawr a, international break neih zawh takah khan German forward hi a khel ṭha hle.

Kum 25 mi Sane hi international break zawhah pawh che ṭha zuiin RB Leipzig 4-1 a an sawp ṭumin goal a khung a, Barcelona 3-0 a an hneh ṭumah pawh inkhel bul ṭantu zingah telin player hmuhnawm zinga mi a ni. Bochum lakah Sane hian freekick aṭangin goal hmahruai a khung a, Bayern ṭantuten lawmpui mai loh chu tih theih dang an nei tawh lo.

Sane chuan, "Mipui auh elna kha tawn leh ka duh tawh lo a, ka theihna anga khelh chhuah a ṭul tih ka hria. Theihtawp ka chhuah ṭhin a, tun ang hian ka khelh ṭhat zel theih ka beisei," tiin a sawi.

Freekick a khung dan sawi zuiin Sane chuan, "Wall kha ka en a, a inremphui loh tih ka hmuh khan wall zawna pet kha ka tum a ni. Freekick hi ka zir nasa a, goal-a ka chantir kha ka lawm hle," tiin a sawi.