Bayern khelh danah Nagelsmann a lawm

Bayern Munich-in Hansi Flick an chelh lo a, nomawi ṭhahnem tak lakpuitu thlak nan kum 34 mi Julian Nagelsmann an lalut. German manager hi kum lamah a la naupang a, Bavarians a enkawl ṭantirh hian nomawi a la chawi loh bawk avangin pressure pawh a ngah hle.

Nagelsmann hian season ṭan hmain Bayern Munich hi chakpui a harsat a, friendly match-ah FC Cologne (2-3), Borussia Monchengladbach (0-2) leh Napoli (0-3) te an hneh loh bakah Ajax nen 2-2 in an inhnehtawk. Season ṭantirha an match hmasa berah Gladbach nen 1-1 in an inhnehtawk leh a, Nagelsmann chunga rinna nghat ngam lo an tam hman.

Mahse, Bayern Munich-in DFL Supercup hmuhnawm takah Borussia Dortmund 3-1 a hnehin nomawi an chawi a, Nagelsmann kaihhruai team an hawikir tawh lo. Bavarians hian match ruk khel tawhin hnehna an chang vek a, an chak satliah lo - goal an khung hnem thei hle.

Kum 34 mi Nagelsmann chuan, "Kan result-ah ka lawm a, kan khelh danah pawh ka lawm. Chutihrualin goal hmaah kha ai khan kan la hriam thei a, passing kan uluk hlek a ṭul a ni," tiin a sawi. Bayern hian Bochum lamah hian shot vawi 24 an nei a, vawi 15 zet chu target-ah a kal lo.

Bayern boss Nagelsmann chuan sawi chhunzawmin, "Ka lawmna em em chu goal kan chhuah lo kha a ni. First half a zawh kha chuan hnehna kan chang dawn tih kha a chiang tawh a, chuvangin second half-a goal chhuah loh kha kan tum. Player-ten theihtawp an chhuah a, goal ṭhahnem tak kan khung chunga kan inthlahdah lo kha ka lawm hle," tiin a sawi.