Bayern-in Oktoberfest lawm nan goal surtir

Bayern Munich-in Oktoberfest pual jersey hring duk an ha a, Inrinni zan khan Allianz Arena-ah an mikhual VfL Bochum chu 7-0 ngawtin an sawp. Bundesliga-ah Bavarians hian match nga khelhah point 13 hmuin hmahruaitu an ni a, nizana Wolfsburg leh Eintracht Frankfurt inkhelin result a la tidanglam thei thung.

Julian Nagelsmann-a hote tan hian Joshua Kimmich-a'n goal hnih a khung a; Leroy Sane, Serge Gnabry, Robert Lewandowski leh Eric Maxim Choupo-Moting ten goal khat ṭheuh an khung bakah Vasillis Lampropoulos-a'n an lamah a khung.

Oktoberfest
Oktoberfest an tih chu khawvela beer festival lian ber a ni a, kum tinin Munich-ah an nei ṭhin. Bavarians hunpuiah hian ni 16 aṭanga ni 18 te a awh a, September thla chanve aṭangin October Pathianni hmasa ber thleng neih ṭhin a ni.

Nikum leh kuminah erawh Covid-19 vangin Oktoberfest hi neih theih a ni lo a, chutihrualin Bayern Munich erawh he hun bik pual hian jersey an siam a, VfL Bochum an hmachhawn ṭum pawh hian an ha. Bavarians hian tun season-ah jersey chi hrang pali an ha tawh.

Goal li phawt
Bayern-in goal khung turin hun rei an mamawh lo a, minute 17-naah freekick aṭangin Leroy Sane-a'n mawi zetin a pet lut.

Joshua Kimmich-a'n minute 27-naah a khung belh a, German midfielder hian Sane hnen aṭanga a ball hmuh chu box chhungah vir puiin chiang takin a pet goal. Bayern-in goal an khung mawlh mawlh a ni ber a, Serge Gnabry pass ṭha bik chu Sane-a'n goal ruakah khung lo mah se Arsenal forward hlui hian minute 32-naah goal a khung tho.

Gnabry hian mual dinglamah ṭha takin a lalut a, ṭhiante pass loin goal-ah a pet tlang a, goal kilah tak, lei hrulin a lut. Bochum chet chhiat a kaltluang a, Thomas Muller-a pass chu defender Lampropoulos-a'n an lamah a tilut. First half-ah 4-0 zet a ni tawh.

Goal thum dang
Second half-ah Bavarians-in an nawr chhunzawm a, Kimmich leh Sane ten chance ṭha an nei nghal. Minute 61-naah goal a lut ta nge nge a, Sane pass chu Gnabry vengtu defender-in an lamah a ti per a, Lewandowski-a'n goal ruakah chiang zetin a khung.

Bochum lamin substitute Silvere Ganvoula M'bouss hmangin goal an khung veah an inngai a, mahse Congolese forward hi a offside vangin pawm a ni lo. Bayern an insiamrem leh a, Bochum box chhunga an ball in pass chu a mawi hle. Minute 54-naah Kimmich pass chu Gnabry-a'n a chip lut a, Leon Goretzka-a'n tauh fuhin Kimmich-a'n 'cool' takin a khung.

Substitute Eric Maxim Choupo-Moting pawhin scoresheet-ah a hming a rawn nemkai ve bawk. Muller-a ball pet chu Bochum keeper Manuel Riemann-a'n dang mah se a per chu Choupo-Moting-a'n goal-ah ṭum hnih a pet a, keeper hian ṭum hnih dang mah se a ṭum thumna erawh a dang thei ta bik lo.

Bayern hian an nawr chhunzawm a, Goretzka ball pet chu keeper Riemann-a'n dang perin Muller-a'n goal-ah a chantir. Mahse, VAR hmanga enlet hnuah offside vangin pawm a ni lo a, Bayern 7-0 in an chak.