Arsenal chakna Odegaard-a freekick

Martin Odegaard-a freekick tawih zet hmangin Arsenal chuan an mikhualna ramah Burnley 1-0 in an hneh. Mikel Arteta nauten tun season Premier League-ah a vawi hnih nan hnehna an chang ve ta.

Vawi thum an chak lo zawn a, tunah chuan a zawnin match hnih an chak ve ta. League bikah Gunners hmabak chu Tottenham a ni dawn - North London Derby hian an insiamṭha tak tak tawh em tih a hrilhfiah ang.

Goal khat chauh
Turf Moor-ah hian kum 1973 hnu lamah Arsenal hian tlawm an nei ngai lo, inrintawkna sang tak nen khualmualah an lenglut - European football khel lo an nih avangin tha tharin an khel thei bawk.

Mahse, goal erawh an khung hleithei lo - Bukayo Saka-a'n huaisen takin Burnley lamah ball a tlan luhpui a, box pawnah defensive midfielder Ashley Westwood chuan lo ti tluin freekick a chawi, a tih tlukna hun leh hmun ngaihtuhin Westwood dem theih a ni lo.

Freekick pet turin Odegaard, Thomas Partey leh Pierre-Emerick Aubameyang te an ding. Real Madrid midfielder hlui kutah tlain tawih zetin 'wall' a pet khum a, ball hi goal kilah kum lutin keeper Nick Pope tan dan phak a ni lo, mawi zetin a lut.

A la fuh lo
Arteta-a'n team din thar a la tum mek zel a, tlarhma lam an la in man tawk lo. Counter attack aṭangin hun ṭha insiam dawn ṭhin mah se Nicolas Pépé leh Aubameyang ten ball an inpe fuh hleithei lo, lak harsa tawk lekin an in pek ṭhin avangin Burnley lam an inveng hman zel.

Bernd Leno aia khel Aaron Ramsdale erawh a khel ṭha, English goalkeeper hian Maxwel Cornet a khung tur chu hnai takah ṭha zetin a dansak a, defender Ben White mualpho tur pawh a chhan hman hram.

England manager Gareth Southgate-a'n a hmuna a en inkhelah White a che fuh lo, a back pass zawi lutuk vangin penalty an chawi teuh hle a, keeper Ramsdale rawn tlan chhuakin a dang hman hram - pound maktaduai 50 man White hian tihsual a nei zauh zauh bawk.

Lawmawm lam
Point thum an hmuh avangin Arsenal tan result ṭha a ni a, player zawng zawng khelh danah duhthu sam vek lo mah se ṭhenkhat erawhin hma an sawn viau tih a lang - Partey, Ramsdale, Odegaard, Gabriel leh Takehiro Tomiyasu ten fak thlakin an khel ṭha.

Odegaard hi kum 22 mi chauh a la ni, kum 16 mi a nih lai khan Real Madrid chuan thawm nei hat khawpin an lalut a nih kha. Spanish club tan hlawhtling ta chiah lo mah se Gunners tan a theihna tak a pho chhuak a nih chuan chakpui tham bakah, inkhel cheimawitu a ni tel thei ang.

Tlarhnungah Gabriel-a'n tharum a ngah a, a sira ding Kieran Tierney-a'n Burnley player nen buaina an neih laia huaisen taka a thlavang a lo hauh te kha fans lam thla ti muangtu a ni, Japanese defender Tomiyasu kha 6ft 2in a sang a nih avangin ball kangah a rintlak hle bawk.

Point khat chauh
Sean Dyche enkawl Burnley hi an tlo a, inkhel hmuhnawm chhawp chhuak lo mah se Premier League team vantlang an ni thei reng. Tun season kal laiah erawh match nga aṭanga point khat chauh an hmuh avangin season thara Premier League khel zel turin an insiamṭhat ran a pawimawh.

Tlarhma lama rinrawl Ashley Barnes leh Chris Wood ten tharum an ngah, mahse goal an nei hleithei lo - an pahnih hian inelna hrang hranga an match hnuhnung pangaah goal khat chiah an khung; Gunners lakah pawh bench aṭanga Cornet luh hma chu an goal nawr a na tawk lo.

Inkhel a tawp hmain Burnley fans tam takin khelmual an chhuahsan a, result ṭha an duh tawh. An match lehpekah Leicester City an lenchilh dawn, an tlawm leh a nih chuan season li daih contract an ziahpui coach Dyche hma hun pawh a nghing ngeiin a rinawm.