Sum vanga buai Derby khelmualah an buai lo!
Zirtawpni khan Derby County fan-ten chanchin lawmawm lo tak an hria a, chu chu sum harsatna vanga an club talbuai thu a ni a, 'administration' a awm thei dinhmunah an ding.
'Administration' a club an awm hian club pawn lam 'administrator' in club an enkawl dawn tihna a ni a, Championship club hi administration-ah an awm a nih chuan English Football League chuan point 12 paihsak an nih tur thu an sawi.
Hetiang boruak karah hian Wayne Rooney enkawl Derby-in Inrinni zan khan Stoke City an mikhual a, 2-1 in an hneh. Derby tan Max Bird leh Curtis Davies ten goal khat ve ve an khung a, Stoke tan midfielder Tom Ince chuan a club hlui lamah khung ve mah se a team chhanhim turin a tawk zo lo.
Stoke tan Sam Surridge leh Ben Wilmot ten chance duhawm an hlah a, Manchester United rawlthar beiseiawm ni ṭhin, Derby-a intuaithar mek Ravel Morrison chuan chance duhawm a hlah bawk.
Club buaina
Derby County neitu Mel Morris chuan June 2019 aṭang khan a club hi hralh chhawn tumin a lo zuar tawh a, mahse, inbiakna an nei ṭhin chungin beisei angin a fel thei ṭhin lo a, administration hial an sawi ri ta.
March thla khan Abu Dhabi-a hmunpui nei Bin Zayed Group nena thawk ho Derventio Holdings nen inbiakna neih ni mah se Mel Morris-a dawhtheihnain a tlin lo a, sumdawng dang nen inbiakna a kalpui zui.
April thla khan Spanish sumdawng hausa Erik Alonso nen inremna an nei leh a, mahse, No Limit Sports Limited neitupa hian a hunah tak sum a pek theih loh avangin May thla khan inbiakna hi a tawp zui.
Derby chuan, "Club hralh turin mi hrang hrang nen inbiakna kalpui a ni a, mahse, tun dinhmun mai atan chuan club lei tur hmuh hi thil harsa a ni," tiin an sawi.
Buaina lo kiang la
Derby chuan club buai chhan lian tak pakhat chu Covid-19 a nih thu an sawi a, "Club min venhimsak tura administrator rawih mai lo chu duhthlan tur dang kan nei lo a ni," an ti a, hri leng avanga pound maktaduai 20 bawr vel an hloh thu an sawi.
Championship club chuan, "He dinhmuna awm a ngai ta hi hrehawm kan ti a, tun season-ah pawh Covid-19 vanga sum lama buaina hian min kiansan thei si lo a ni," an ti a, club ṭantu tan chuan thu hriat hrehawm tak a ni ang.
Derby hian match riat an khelh aṭangin point 10 an nei mek a, team 24 inelnah league-ah 12-na an ni mek. EFL sawi anga point 12 paihsak an nih chuan -2 in an awm dawn tihna a ni a, season thara Championship khelh chhunzawm a huphurhawm khawp ang.
Nipui transfer-ah pawh khan Rooney chu free transfer a nih loh chuan player lakluh phalsak a ni lo a, a thlawna player-a lakluhte pawh hlawh pek tur chungchanga inkaihhruaina khirh tak nei sa chunga lakluh an ni!
Hremna lian zawk
Championship club zinga sum hmang na ve ṭhin tak Derby hi 2016, 2017 leh 2018-a an sum hman dan pawh enfiah mek a ni a, point 12 paihsak piahlamah hian hremna dang hmachhawn thei an ni.
July thla khan an sum hman dan dik lo avangin Derby hi £100,000 chawitir an lo ni tawh a, tunah hian point 12 piahlamah point kua dang paihsak leh thupek an zawm dan a zira point dang paihsak tura hrem 'belh' theih dinhmunah an ding mek.
Hemi hremna chungchanga EFL leh Derby inbiakna erawh chawlh lailawk a ni rih a, hei hi administration-a Derby an awm leh rih phawt dawn vang nia sawi a ni.
Derby hian Premier League khelh an tum luatah man to tak taka player lei an ngah a, uchuak taka player hlawha insen an nei nual bawk - heng zawng zawng hi tunah an tuar ta ni berin a lang.
Administration?
Suma club an talbuaiin administration-ah an lut ṭhin a, club chhanhim nana tih a ni ber - chutianga administration-a an luh chuan club enkawlna zawng zawng kha administrator-te kutah a awm.
Administrator-te chuan khelmual lam tiam loin club inrelbawlna zawng zawng an kalpui ang a, hetih chhung hian club lei duh tur an zawnsak ang a, an hmu lo a nih chuan club bungrua tihral theihte tiralin ba an rulhsak ang.
Football-ah chuan heta hralh theih tih hi player, ground, training-na khelmual leh bungrua te a ni a, ba rulh tur tihah hian pek hmasak tur an awm leh bawk.
Club-in sum ba a pek hmasak ber tur chu player-te an ni a, a dawtah manager niin, a dawtah football club dangte an ni - Professional Footballers Association (PFA) leh league-ten an dawt ve leh a ni.