Mizoramin medal an la lo

Mizoram Boxing Asso-ciation (MIZBA) chuan 5th Elite Men's National Boxing Championship-a tel turin boxing panga a tir chhuak a, medal hlawh chhuak an awm lo.

Inspire Institute of Sport, Karnataka-a neih inelnaah hian Mizo boxer zinga thleng sang ber C. Lalduhawma chuan nimin khan quarterfinal-ah Delhi boxer Rahul Rathi a hneh lo a, referee-in first round-ah inhnek a titawp.

Durtlang Leitan boxer Duhawma hian first round-ah Jharkhand boxer Vikash Tiwari chu unanimous decision-in a hneh a, second round-ah Arunachal Pradesh boxer Radhe Dare chu round 3-naah referee tih tawp ngai khawpin hneh mah se quarterfinal a paltlang ta chuang lo.

Middleweight (71-75 kg)-ah Malsawmtluanga'n first round-ah Karnataka boxer Prashant a hmachhawn a, walkover-in a chak. Lunglei boxer hian second round-ah Services boxer Sumit hneh loin a tla.

Light Middleweight (67-71 kg)-ah Republic Veng boxer Zochhuanawma Fanai-in India aiawh pawha fehchhuak tawh Railways boxer Ashish Kulheria chu first round-ah a hneh lo.

Welterweight (63.5-67 kg)-ah Khatla South boxer Zomuansanga chuan match hmasa berah All India Police boxer Subham Kumar lakah split decision (3-2) in a vanduai.

Featherweight (54-57 kg)-ah Tuipui boxer Lallawmawma'n first round-ah Assam boxer Bulen Buragohain chu unanimous decision (5-0) in an hneh a, second round-ah Delhi boxer Rohit Mor chu unanimous decision in a hneh lo.

Mizoram coach R. Lalchhuanawma (Sete) chuan, "Senior level chinah chuan vannei leh vanduai kar a hla a, first round aṭangin ka naute khingpui a khirh. Kan skills-ah chuan state dang aia kan hniamna ka hmu lo a, mahse kan hnek a in nat hleih. Hmasawnna tur kan ngah hle," tiin Vanglaini a hrilh. Mizo boxer zingah senior level-a gold medal la an awm lo.