Goal khung tura piang Haaland

Erling Haaland chuan goal khung thei bik a nihna a lantir zel. Nilaini zan Champions League inkhelah Haaland-a'n goal hnih khungin Borussia Dortmund chu Club Bruges lakah 3-0 in hnehna a chanpui.

Group F inkhel dangah Lazio leh Zenit St Petersburg te 1-1 in an inhnehtawk a, an group aṭangin kal fal thei an awm lo. Hmahruaitu Dortmund-in pont ruk hmuin, pahnihna Lazio chuan point nga neiin Club Bruges (points) leh Zenit (1) te an indawt.

Dortmund tan hian Thorgan Hazard-a'n goal hmahruai a khung a, chawlhlawk hmain kum 20 mi Haaland chuan goal hnih khung belhin khualmualah nuamsa takin hnehna an chang.

Norway striker Haaland hian kumin January thla khan Dortmund hi a zawm, Bundesliga club tan hian match 28 a khelh aṭangin goal 26 zet a khung. Champions League bikah match 11 a khelh aṭangin goal 14 a khung thei a, hetiang zat goal khung tura match mamawh tlem ber a ni hial.

Lucien Favre-a enkawl Dortmund hian Inrinni zanah league match hautak an khel zui dawn, champion lai leh hmahruai mektu Bayern Munich chu Signal Iduna Park-ah an mikhual zui dawn.

Thawhlehni zan khan UCL-ah Bayern chu an lo inlan tawh, khualmualah RB Salzburg 6-2 in an sawp. Bayern leh Dortmund inkhel tur hian ngaihven a hlawh zual dawn, match ruk aṭanga point 15 ve ve hmu thei an nih avangin league hmahruaitu zawnna a ni nghal ang.