Sakho-a'n thiam a chang leh si!

World Anti-Doping Agency (WADA)-in kum 2016-a damdawi hman phal loh a lo hman avanga a hrem tawh Crystal Palace defender Mamadou Sakho lakah thupha a chawi a, French defender hian WADA lakah thiam a chang. 

Sakho hi thau paihna damdawi a hmang tiin WADA chuan April 23, 2016 khan a sawi a, ni nga hnuah UEFA chuan ni 30 chhung inkhel thei lo turin a hrem. Mahse, European football-a thuneitu sang ber hian a zirchian hnuah Sakho damdawi hman hi WADA hnuaia damdawi hman phal loh zingah a tel lo tih hmu chhuakin hremna hi an hlip. 

Hetihlai hian Sakho hi Liverpool defender a ni a, Europa League final-ah Sevilla a hmachhawn theih loh phah hial - France tana vawi 29 inlan thei defender hian Euro 2016 squad-ah a tel loh phah niin a sawi bawk. 

UEFA-in Sakho hremna an hlih hnuah pawh WADA hi an dinna ngaiah an ding a, French defender hian WADA a khing zui. A tawpah chuan WADA hian thupha chawiin, intih hmingchhiat manah Sakho hi sum engemaw zat an pe ang. 

WADA chuan thuchhuah siamin Sakho hnenah ngaihdam an dil a, French defender chuan, "Inpuh hmingchhiat theihna ṭha lo tak a ni a, vawiin hi ka thawnthua hun tawn langsar tak a ni," a ti a, thiam a chang ta chu a hlim hle.