Mizo club veltu Mizo tlangval

Indian Super Cup-ah Aizawl FC-in Indian Super League champion Chennaiyin FC hnehin bul ṭan mah se match hnihnaah East Bengal hneh loin an tla.

Nimin tlai inkhelah hian goal a lut lawk lo a, injury time-ah R. Laldanmawia'n penalty aṭangin East Bengal chakna goal a khung a, hero of the match-ah thlan a ni bawk. Mizo club veltu chu Mizo tlangval a ni a, Aizawl FC-in an beisei ram thleng ta lo mah se Mizoten an thlen san tawh zia a lang.

Fixture harsa
Aizawl FC-in AFC Cup an khelh avangin club dang aiin an hah. Mizo club hian Super Cup match hmasa ber March 31-a Chennaiyin an hneh hnuah Guwahati-ah zinin April 5 khan AFC Cup-ah Bengaluru FC an hmachhawn a, hei vang hian East Bengal nena an inkhel tur atan hian practice match vawi khat chauh an nei thei.

Bengal an vanduai
East Bengal-in first half an thunun hlak a, goal chance pawh an ngah hle. Amaherawhchu Aizawl FC an vannei a, an tana ṭha turin referee-in thutlukna a siam bawk.

Minute 12-naah Alfred Kemah Jaryan chuan season liam taa a teammate Mahmoud Al Amna a veng hneh lo a, box chhungah a kuai thluk bakah a pal bawk a, referee-in Syrian midfielder beiseina a tihhlawhtlin sak lo a, goal kick a pe.

Lalchhawnkima'n minute ruk hnuah AFC winger hlui R. Laldanmawia chu box chhungah bawk a titlu a, penalty shout vawi hnihna erawh a hma aiin a nem hret a, referee-in penalty pekna turah a ngai chuang lo.

East Bengal-in an thunun chhunzawm a, ding lam aṭanga Samad Ali Mallick-a cross-shot chu defender Kimkima'n a khawih per zarah Dudu Omagbemi-a'n hnai tak aṭangin a khung lo.

First half-a Aizawl FC chance neih chhun chu Masih Saighani-a'n box pawn aṭanga petin goal sirah chiah a kal a, halftime-hmaa chance hnuhnung ber pawh Red and Gold thoin neiin Katsumi Yusa-a'n box pawn aṭangin a pet a, keeper Lalawmpuia'n a dang.

AwP-a a langsar
Second half-ah Aizawl FC an insiamṭha a, Kolkata club lian nen inhnehtawk chho mah se player langsar ber erawh Mizo keeper AwP-a a la ni fan. Aizawl Venglai tlangval hian East Bengal striker Dudu chu ṭum hnih one-one in a hmachhawn a, a chungnung zawkah a ṭang ve ve a, Mizo club-in beiseina an nei zel.

AFC pawhin goal khung theihna chance an nei a, H. Lalmuankima chuan corner-ah Lalramhmunmawia pein AFC left back chuan goal-ah petin goal sirah chiah a kal a. Masih Saighani-a'n 'hand of god' entawnin East Bengal keeper Ubaid CK man tur hnek sak a tum a, a lan chian em avangin referee-in yellow card a pe.

A tawpah drama
Aizawl FC-in injury time-ah goal khung theihna hun ṭha an nei a, Chennaiyin nena khel ṭha Andrei Ionescu chuan keeper chauh hmachhawn mah se a ball pet chu Ubaid-a'n a dang hman.

Red and Gold-in an vaw let thut a, substitute Ansumana Kromah chu box chhungah keeper AwP-a'n a titlu a, referee C. R. Srikrishna-a'n loh theih lohin penalty spot a kawk. Mizo tlangval R. Laldanmawia a rawn ding chhuak a, Sialhawk tlangval hian a club hlui lamah East Bengal chakna goal a khung.

East Bengal forward Danmawia chuan inkhelh banah, "Kan vannei ka tia, ka thinlung zawng zawngin ka lawm," tiin Star Sports-in an kawmnaah Mizo ṭawng ngeiin a sawi a. Aizawl FC forward hlui hian Mizo club lama a goal khung hi a club hlui laka zahna entir nan a lawm duh lo.