Germany-a roreltu Bayern Munich

Bayern Munich-in Inrinni zan khan Augsburg 4-1 in an hneh a, Bundesliga match nga khelh tur la awm mah se an hnuaia awm Schalke lakah point 20 zetin an fal a, umpha thei an awm tawh loh avangin an champion. Jupp Heynckes-a kaihhruai team hian kum zawnin a vawi ruk nan league title an la a, Germany-ah Bavarians khing phak reng an awm lo.

WWK Arena-a inkhelah Bayern defender Niklas Sule chuan an lamah minute 18-naah a khung a, he goal hi inkhel bul ṭan ṭha lo Bavarians fuih phurtu a ni. Minute 32-naah Corentin Tolisso hmangin Bayern-in siphurh an sut a, James Rodriquez chuan minute ruk hnuah hmahruaina goal khungin second half-ah Arjen Robben (62') leh Sandro Wagner (87') ten chak nemnghehna goal an khung belh.

Bul ṭan fuh lo
Bayern hian tun season-ah Carlo Ancelotti hoin bul an ṭan ṭha bik lo a, Italian manager hi Paris Saint Germain lakah 3-0 a an tlawm hnuah an ban. Champions League lama an result ṭhat loh vang chauh ni loin league lamah pawh beisei an pha lo a, French club laka an chak loh hma hian Hoffenhiem lakah an tlawm tawh a, an mualah Wolfsburg nen an inhnehtawk bawk.

Pep Guardiola-a'n season thum chhung league-ah a champion pui a, record ṭhahnem tak a siam a, inkhel an thunun ṭhin bawk avangin Ancelotti hian Spanish manager vanga a chunga beiseina sang tak chu a phur zo lo.

Coach thlak fuh
Bavarians-in manager hna chawlhsan tawh Jupp Heynckes an kokir a, kum 72 mi ni tawh mah se a thil hriat a la hlui lo. Ancelotti-a'n Bayern-ah Pep Guardiola a tluk lo a, chutiang chiah chuan Spanish manager hian Bayern tana history neih ṭhatah kher chuan Heynckes hi a pha lo.

German manager hian Bayern a enkawl hmasak ber 1987–1991 chhungin vawi hnih a champion pui. Kum 2009 khan Bayern hian a football chawlhsan tawh chu an kokir tawh a, hemi ṭum hian Jurgen Klinsmann thlakin Champions League khel pha lo dinhmuna ding tawh chu match nga khelh hmabakah vawi li chak puiin vawi khat an inhnehtawk a, pahnihna dinhmun an hauh pha.

Heynckes hian Bayer Leverkusen-ah season hnih hmang lehin Bavarians-ah a rawn kir a, a rawn let kumah hian inelna lianah pahnihna an ni vek. 2012–13 season-ah erawh inelna zawng zawngah hma sawn vekin Champions League, Bundesliga leh German Cup-ah te a champion pui a, Spanish manager Pep-a'n Bavarians tana a tih ve theih lo a ni.

Ancelotti huaia result a ṭhat tak lohah chuan Heynckes bawk an kokir leh a, hetihlai hian pakhatna Borussia Dortmund chu point nga ngawtin an pha lo. Hun rei lote chhungin Bayern rawn siam tharin Italian manager-in chhawr ngaihna tak a hriat loh Thomas Muller pawh player naran aṭangin team tichaktu a ni chho nghal a; match nga khelh tur la awm chunga an champion hian engkim a sawifiah.

Ancelotti tan
Bayern champion puitu coach Heynckes chuan, "Kan hlawhtlinna hi Italy-a awm Carlo Ancelotti tan ka hlan duh a, ani kha coach ṭha tak a ni," tiin a sawi.

Heynckes let hnu hian Bayern hian match 31 khel leh tawhin chung zinga match 28-ah chuan hnehna an chang a, tun ṭum hi a nomawi palina niin Bavarians a champion pui hmasak ber aṭangin kum 29-na a ni. Bayern a enkawl hmasak ber ṭuma a champion hian tun season-a an player pawimawh James Rodriquez leh player dang engemaw zat an la piang lo.

Khualmualah zel
Mak ang reng tak erawh Bayern hian 2000-a an mual ngeia an champion hnuah Allianz Arena-ah pakhatna an nih an la nemnghet leh lo. Vawi 12 an champion zinga vawi 11 chu khualmuala an chak leh an inhnehtawk hmangin an nemnghet a, vawi khat dang erawh an khelh loh

ṭumin inkhel dang result hmangin an nemnghet thung.

Bayern-in a vawi 28 nan German league title an la a, an club chanchin sawi nana MiaSanMeister (roreltu kan ni) tih hmang thei khawpin team dang chungah an leng. Tun ṭum hi Franck Ribery tan hun hlimawm a ni a, kum 35 a tlin champhaah Bundesliga title vawi riatna a la.