United hmaah Premier League champion tur an kun
Manchester United-in an zahawmna humhim turin goal hniha an hnufual hnuah Manchester City chu 3-2 in an lehthal a, Pep Guardiola hoten Premier League an champion hun an sawi tlai hret ni maiin lang mah se inkhelh bana Etihad Stadium-a mittui farin engkim a sawifiah.
Inrinni zan Manchester Derby-in ngaihven a hlawh a, Jose Mourinho hote hnehna chan hian English football history-ah hmun pawimawh a chang ang. Arab sum mawm leh Pep-a thluak hmanga team din chu a la famkim lo tih a lang a, Premier League-a an hmelma United ropuina elpha turin hun rei zawk an la mamawh a, an inthlauhna chu an nomawi chawi in tam hleih zat zet a la ni.
Nomawi a hnai
Etihad Stadium-ah City-in bul an ṭan ṭha a, Pep-a'n a player pawimawh Kevin de Bruyne, Sergio Aguero, Gabriel Jesus leh Kyle Walker te chu bench-a a dah chungin inkhel an thunun a, United player-te chu hnai taka City inkhel entu ang chauh an ni.
Derby hlu bik a ni tih hrechiangtu Vincent Kompany chuan minute 25-naah harsatna nei lo a Chris Smalling venna hnuai aṭanga tal putin chiang zetin a tauh lut a, champion lawmna a inṭan a, City ṭantu tan chuan thawm rin lam chu duhthusam a ni.
Minute nga hnuah Ilkay Gudogan chaun mawi taka United tlarhnung a vir khum hnuah goal kilah a pet lut a, United an zawr chhunzawm. City-in goal thum aṭanga goal nga thleng pawh a khung belh theihna hun ṭha an nei a, Raheem Sterling chuan tun hmaa a hri ṭha lo neih goal hmaa ho tak tak a hlah chu a rawn nei let leh a, hattrick siam theihna hun ṭha a hlah a, Gundogan pawhin hnai tak aṭangin David de Gea a paltlang thei lo bawk.
Thawnthu dang
City-in goal engzat nge an khung belh dawn tih chu inkhel entute thlirlawk dan a ni a, amaherawhchu halftime minute 15 chhung chu Pep-a aiin Jose Mourinho-a'n a hmang ṭha zawk.
City aia United thlangtu Alexis Sanchez chuan Mourinho hnuaia a khelh ṭhat ber zan a hmang a, Chilean midfielder ball vawrh luh chu Ander Herrera chuan Paul Pogba tan pe lehin French midfielder hian chiang zetin a pet goal. Minute hnih em pawh a ral hmain Alexis-a cross chu Pobga-a'n a tauh lut a, 2-2 a nih tak avangin engkim a danglam ta.
Minute 69-naah Sanchez-a ball vawrh luh bawk chu Chris Smalling-a'n goal-ah a chantir a, Etihad Stadium-a mipui tam zawk an reh a, mikhual ṭhutna lam erawh thawm a ring hle.
Referee leh De Gea
Pep-a'n chak ngei a duh zia lantirin Gabriel Jesus leh Kevin De Bruyne te a luhtir nghal a, Sergio Aguero pawh rawn inlan vatin 'tiki taka' vs 'bus park' chu inkhel kalhmang tur tih a lang nghal.
De Bruyne ball pass changtu Aguero chu United left back Ashley Young-a'n tlawh fuh mah se referee Martin Atkinson-a'n penalty pekna turah a ngai lo a, replay en let erawh chuan red card thlenga pek theih niin a lang.
United keeper David de Gea a langsar zui a, Aguero tauh a kut dinglama a beng chhuak hman chu 'world class save' a ni a, injury time-ah Nicolas Otamendi pet chu Sterling-a'n tiperin goal ban a per a, hemi per hi De Gea-a'n a dang hman a, replay en let chuan Sterling-a'n khawih lo se Spanish keeper tan meuh pawh hian dan ngiahna a awm lo niin a lang. United an ṭangtluan hram a, khualmualah 3-2 in hnena an chang.