Juve chakna Dybala hattrick
Paulo Dybala hattrick hmangin Juventus-in an mikhualna ramah Benevento chu 4-2 in an luhchhuah a, Turin club hian point 81 hmuin pahnihna Napoli aiin point rukin hma an hruai fal ta.
Inrinni zan Serie A inkhelah champion lai Juventus chu Dybala-a'n ṭum hnih hma a hruaipui a, mahse table mawng phaha awm Benevento lamin Cheick Diabate hmangin an su ve leh zel.
Tun season-a vawi 25 zet chak lo tawh Benevento-in beiseina an neih san vanglai takin Dybala bawkin a penalty vawi hnihna chhuih lutin hattrick a siam a, Argentine forward hian tun season kal laiah league goal 21 a khung tawh. Hun tawp hma deuhin Douglas Costa chuan yard 26-a hla aṭangin an chak nemnghehna a khung bawk.
A zawna season ruk chhung Serire A nomawi chawi tawh Juve hian Napoli aiin match khatin an khel tam zawk a, nizana Napoli leh Chievo te inkhel result a zirin an inthlauhna hi la danglam leh thei a ni. Napoli hi chak pawh nise an inkarah point li a awm dawn tho avangin league match sarih chiah khelh tur nei tawh Juve dinhmun a ṭha rih hle.
Massimiliano Allegri-a'n Benevento lakah a player neih ṭhat ṭhenkhat chu hahchawlhna hun a pe. Italian champion hian Champions League quarterfinal second leg khelh hmabak an la nei a, inkhel hmasa zawkah Real Madrid chu si thum faiin hneh lo tawh mah se huaisen taka beih let an la tum tih a chiang.
Italian manager chuan beisei an la neih thu sawiin, "League leh Coppa Italia-ah te hian kan thisen far tawp thlengin kan ṭang tur a ni a, chutihrualin Champions League-ah pawh a ngai reng tur a ni. Madrid-ah ṭha chungchuang taka kan khelh a ngai dawn a, khawvel mipui hmuhah thil mak thlentir kan tum dawn a ni," tiin UCL aṭanga an la tlak bik loh thu a sawi.