ITI beisei a tawp, Durtlang North an sang zel

Tualchung Volleyball inelna sang ber Pro Volleyball League season thumna khelh mekah ITI Veng chuan semifinal beiseina an nei tawh lo a, league hmahruaitu Durtlang North erawh midang ban phak lohin an sang zel.

Zirtawpni zan R. Dengṭhuama Indoor Stadium, Mualpuia inkhelah PVL season hmasa ber champion Anastasia, Electric Veng chuan ITI Veng lakah 23-25, 25-22, 25-20, 25-18 in hnehna an chang. Anastasia-in kumina hnehna an channa hmasa ber tura thawhhlawk tak Atul Kumar Singh chu RFL Player of the Night atan thlan a ni.

Kaithar ITI hian league match vawi li an khelhah chak ni hmel an la hmu ve lo a, set hnih chiah an la sual chhuak thei a ni. April 13 zan hian league round match hnuhnung ber atan Tuichangral an hmachhawn dawn a, beisei nei tawh lo mah se PVL-a chak nei loa tawp ai chuan hnehna chan an tum ang.

Inrinni zanah champion lai Hunthar Veng leh kaithar Durtlang North an insu ve leh a, inkhel hmuhnawm leh boruak sang takah 25-22, 25-23, 24-26, 25-27, 15-11 in Durtlang North an chak.

Semifinal an luh chian hnuah Durtlang North hian Anastasia lakah set hnih an hloh hnuah an tho leh thei a, Hunthar lakah pawh set hnih hloh mah se set hnuhnung pathum la vekin ropui takin hnehna an chang. Ranveer-a'n point 58 hlawh chhuakin RFL Plastics Player of the Night atan thlan a ni.

Hunthar veng hian April 11 zanah an league match hnuhnung ber an khel dawn a, champion tawh Anastasia nen an intawng ang. Tun dinhmunah Anastasia hi pangana an ni mek a, point li nei mekin set khat aia tam hloh lova an chak a nih chuan Hunthar nih rualin point sarih an hmu thei dawn a ni.

PVL-ah hian Mizoram Volley­ball Association hnuaia team ṭha paruk an inela, an inkhelh kual vel hnuah a sang pali ten semifinal an khel leh dawn a ni. Durtlang North-in semifinal an lut chiang tawh a, ITI an tla chiang tawh bawk. TNT, Muanna Veng, Hunthar, Tuichangral leh Anastasia ten a thiam pali zinga tel turin beiseina an la nei.