PSG chelhtu Etienne

Ligue 1 champion ni turin Paris St-Germain tan match ruk khelh tur an la neih aṭangin point nga bak a ngai tawh lo. Unai Emery naute hian hun tawp dawna Mathieu Debuchy-a own goal hmangin Saint-Etienne chu 1-1 in an inhneh­tawkpui hram.

Zirtawpni zan in­khelah mualneitu Etienne lamin Newcastle forward Remy Cabella hmangin minute 17-na lekah hma an hruai. Remy Cabella hmangin an goal hnihna khung theihna hun ṭha nei mah se PSG keeper Alphonse Areola chuan penalty a dan sak.

Chawlk hma deuhin PSG defender Presnel Kimpembe chu yellow card vawi hnihna hmuh vangin hnawhchhuah niin, kum 2012 hnua a vawi khat nan Etienne lakah PSG an tlawm dawn niin a lang hman.

Etienne bawk an hlauhawm leh, Morocco winger Oussama Tannane-a'n goal bar a pet per dawp bawk a, an vanneih ṭum nise chuan goal thum khung theihna hun an nei. Neymar tel loa khel PSG tlarhma an hriam tawk lo a, striker Edinson Cavani-a'n goal ruak a khung ṭhelh bakah hnai tak aṭangin a tauh goal lo chiah bawk.

Paris club hian match 32 an khelh aṭanga point 84 hmuin hmahruaitu an nih chhunzawm zel. Inrinni zan khan champion lai AS Monaco chuan Radamel Falcao leh Rony Lopes te goal hmangin Nantes chu 2-1 in an hneh ve bawk.