Messi hoin Barca an ropui zel
Barcelona tan Lionel Messi-a'n a hna ngai a thawk a, Leganes lakah hattrick siamin Catalan club hi 3-0 in hnehna a chanpui - an ropui zual zel.
Messi-a'n freekick hmangin goal hmahruai a khung a, tun season-ah direct freekick hmanga goal ruk a khungna chiah a ni - 2006-07 Season-a Ronaldinho hnua La Liga-a season khata heti zat freekick hmanga goal khung leh thei hmasa ber a ni.
Barcelona-in tun season-ah league match 31 chhung chu tlawm hmel an hmu tawh lo a, tlawm miah loa league nomawi chawi turin match sarih bak khelh an mamawh tawh lo.
Messi & goal
Minute 27-na lekah Messi hmuh turin a awm nghal a, Argentine forward hian yard 30 aṭangin mawi zetin freekick a pet lut a, goal special bik a ni - Leganes keeper Ivan Cuellar tan tih theih a awm lo.
Barcelona fans hlim authawm pawh a reh fel hmain Messi bawk kan hmu a, Philippe Coutinho hnen aṭanga a ball hmuh chu a goal hnihna ni turin a khung. Leganes-in awlsam taka tlawm an tum bik lo a, Nabil el Zhar hmangin an si phurh an sut ṭhen.
Mahse, hun tawp nan minute hnih chiah a awm tawh tihin Messi bawk kan hmuh chhunzawm a, Ousmane Dembele siamsak chu a hattrick siam nan khungin Barca an chak chiang.
Messi & 45
Lionel Messi-a'n goal thum a khung chiah khan a career-a hattrick a siam vawi 45-na a ni a, a theuneu lo hle. Barcelona forward hian tun season La Liga-ah match 30 khelin goal 29 a khung tawh a, ani aia khung hnem an awm rih lo.
Messi hian league bikah goal 29-a khung bakah assist vawi 12 neiin goal-ah vawi 41 a inrawlh tawh - inelna hrang hrangah match 46 khelin goal 39 a khung tawh. League goal khung hnem lama Messi hnaih bertu Luis Suarez chuan goal 22 khungin assist vawi ruk a nei.
Cristiano Ronaldo-a'n league-ah goal 22 khungin assist vawi nga a nei thung. Inelna hrang hranga match 36 aṭanga goal 39 khung thei Ronaldo dinhmun erawh nizana Atletico Madrid nena an inkhela a chet dan a zirin a danglam leh thei.
Barca & record
Barcelona-in season hmasa aṭanga chhiar telin league match 38 chhung chu tlawm hmel an hmu tawh lo a, Real Sociedad record dinglai chu an nihrual.
Real Sociedad hian 1978-79 leh 1979-80 season khan match 38 chhung chu tlawm hmel hmu loin an lo kaltluang tawh a, Barca khelh dan enin Catalan club hian record thar an siam ngei a beiseiawm.
Hei mai hi a ni lo. Barcelona-in league match 31 chhung tun season-ah ngamtu an la tawn loh avangin record thar siam thei dinhmunah an ding mek - an hmabak match sarihah an tlawm miah loh chuan La Liga-a season khata match 38 a awm hnua tlawm miah loa season khar thei awmchhun an ni ang.
Messi a dam
March thla tawp lamah Messi a inhliam a, Argentina tana a fehchhuahnaah pawh Italy leh Spain a hmachhawn ve thei lo. Mahse, Sevilla laka 2-0 a an tlawm reng ṭumin Barca chhan turin tirh luh a ni a, Leganes lakah rin loh takin chhawr a ni bawk.
Barcelona boss Ernesto Valverde chuan, "Messi a dam ṭha a, goal khung hi chu engtiklai pawhin a ṭangkai a ni. Dam ṭha var tur chuan game a khelh tam a ngai tih kan hria a, tun dinhmunah chuan a hriselna a ngaihtuahawm lo," a ti.
Messi-a'n freekick a pet luh khan record pahnih a siam - Ronaldinho hnung zuia La Liga season khata freekick vawi ruk pet lut thei a nih bakah Opta-in 2003-04 hnua statistics mumal taka a kalpui hnua La Liga match ruk chhung box pawn aṭanga a zawna goal khung thei hmasa ber a ni tel.