Chelsea chakna Timo Werner

Timo Werner-a penalty vawi hnih bakah Tammy Abraham goal khat hmangin Chelsea chuan Rennes 3-0 in an hneh a, tun season Champions League match thum an khelh tawhah point sarih an hlawh chhuak.

Blues hian an match hmasa zawkah Krasnodar an hneh a, midfielder Jorginho-a'n penalty a hlah. Inkhelh banah manager Frank Lampard-a'n penalty chungchang an sawiho tur a sawi a, tunah chuan striker Werner kutah a hlan tih a lang.

Minute 10-na lekah defender Dalbert-a penalty chawi chu Werner-a'n a khung, chawlhlawk hma deuhin Brazilian defender tho hian handball vangin penalty a chawi leh a, hnawhchhuah nghal a ni - German forward bawkin a khung.

Penalty vawi hnihna an hmuh danin sawi zui a hlawh, Abraham-a ball pet chu Dalbert-a'n a dansak a, ball per hian a kut a fuh. German referee Felix Zwayer-a'n VAR hmanga a en hnuah penalty a pek bakah a hnawtchhuak.

Blues manager Lampard chuan, "Premier League lamah chuan referee ten an chhia leh ṭha hriatnain thutlukna an siam chang a awm, dan kan hman mek hi ka duh zawng a ni bik lem lo," tiin tihpalh vanga handball pawh penalty an pe vek chu a pawm loh thu a sawi.

Season tir lamah Chelsea hi an tlarhnung phui lo vangin sawisel an hlawh, keeper Edouard Mendy leh defender tawnhriat ngah Thiago Silva an neih chinah erawh an danglam, tun hnai match nga chhung chu goal chhuah loin an awm.

UCL-ah kal tluang viau mah se Blues lawm a kim lo, midfielder pawimawh Kai Havertz chu Covid-19 a kai avangin Rennes an mikhual ṭum hian a inlan thei lo, pound maktaduai 71 man hi khung hran niin Inrinni zana Sheffield United nen Premier League an khelh hunah pawh inlan hman lo tura ngaih a ni.