India rit chawi chakte che ṭha zel

Commonwealth Games vawi 20-na neih mekah Indian weightlifter-te an che ṭha chhunzawm zel a, nimin khan Punam Yadav chuan hmeichhe 69kg category-ah gold medal a la.

Kum 22 mi Punam hian 2014 Glasgow-ah khan bronze medal a lo la tawh bawk a, tun ṭumah hian pakhatna ni tur hian snatch-ah110kg chawin clean and jerk-ah 122kg a chawi bawk a, inelna a hmachhawn tawh zawng zawng zinga a chet ṭhat ber ṭum a ni.

July 9, 1995 khan Varanasi bula thingtlang khaw pakhat Chandmari-ah Yadav hi a piang a, mi neinung tak an nih loh avangin infiamna luhchilh tur pawh hian sum leh paiah harsatna a tawk. A unaunu leh a patea te puihna zarah inelna a hmachhawn thei hram a, a theihna hi SAI Centre (Lucknow) lam chuan lo hmuin a inzir chhunzawm theih phah.

Punam hian Asian Junior Championship 2004 khan a international medal hmasa ber a la a, 2014 CWG khan bronze a la leh bawk. 2015 a rawn thlen meuh chuan Punam hian (63kg) Commonwealth Youth, Junior & Senior Championship-ah khan senior leh junior inelnaah gold a la thei a ni.

Nimin tlai thleng kha chuan India hian gold medal paruk a la tawh a, Manu Bhaker-i chuan women's 10 metre air pistol inkahsiakah gold a la ve tawh a, midang panga Saikhom Mirabai Chanu, Khumukcham Sanjita Chanu, Sathish Sivalingam, Ragala Venkat Rahul leh Punam Yadav te chuan weightlifting vekah gold hi an la.

Ragala Venkat hian kum li liam ta khan railway station-a tui a in avangin mit bua (jaundice) natna a neih phah a, kg 20 zet hlohin kum khat chhung infiamnaah a tel thei lo a, thla ruk liam ta khan a nuin a thih san a, a khup-ah hliam a nei bawk a, chutichung chuan mipa 85 kg inelnaah a chawi rit ber a, a chanchin hian midang tan chona nasa tak a siam a ni.