Zidane-a hoten hmabak an la nei ; Zaninah Real Madrid Vs Juventus

Champions League quarterfinal second leg chu zanin dar 12:15 hian Santiago Bernabeu-ah Real Madrid leh Juventus te an khel dawn. Spanish club hi khualmualah 3-0 in chak tawh mah se minute 90 khelh tur a la awm.

Zidane a fimkhur
Los Blancos manager Zinedine Zidane chuan,"Champion tura rinkai kan nih leh nih loh hi ka ngaihtuah lo. Kan duh chu semifinal kan thlen theih dan tur zawn hi a ni a, Juventus nen kan inkhelh tur chauh kan thlir. Inkhel pawimawh a ni a, thil dang ngaihtuah a thiang lo," tiin hmabak an la neih thu a sawi.

Champions League knockout chinah hian khualmuala goal thum khung a, goal chhuah lo bawk chuan stage sang zawk an thleng vek a. Statistics en letin Real Madrid dinhmun a ṭha a, an muala khelh tur a nih bakah player an neih ṭhat avangin semifinal an thlen ngei a rinawm bawk.

Chutichung chuan Zidane chuan, "Mi zawng zawngin an ngaihdanin an thlir lawk a, an thlirna aṭang chuan semifinal kan thleng tawh. Hei hi kan thlir dan tur a ni lo a, keini chuan chak lo thei kan ni tih hre rengin kan khel ang," tiin a ṭawng fimkhur hle.

Hmabak harsa zawk
Juventus tan goal thum chhuaha thawhleh a harsa dawn a, harsatna belhchhah turin Paulo Dybala leh Rodrigo Bentancur te hrem vangin an inlan thei dawn lo a, khup hliam vangin Federico Bernardeschi a la dam hman lo bawk.

Argentine forward Dybala hian league match hnuhnung bera Beneveto 4-2 a an hneh ṭumin hattrick a siam a, Real Madrid nena a tel lo tur hi manager Massimiliano Allegri tan a uiawm lehzual ang.

Amaherawhchu, Juventus hi club naran an ni lo a, history nei ṭha club ni ringawt loin an vanglai hun tawng mek tho an ni. Tunah hian Serie A-ah hmahruaitu an ni a, anmahni hnaih bertu Lazio aiin point liin an sang zawk.

Juve manager Allegri chuan, "Football-ah chuan engpawh thleng thei a ni. Kan vanduai ṭum an tawng a, Real Madrid chungah pawh a thleng ve thei a ni," tiin beisei an la neih thu a sawi.

Italian manager chuan club hming tiṭha tura theihtawp an chhuah tur thu a sawi a, Real nena an inkhel tur hre chungin Benevento nena an inkhelh hian player pakua zet a thlak a, training-ah pawh group hnihah inṭhenin Santiago Bernabeu-ah team ṭha ber chhawp chhuah a tum. Thu lawmawm chu Medhi Benatia leh Miralem Pjanic te hremna aṭangin an let tawh a, Mario Mandzukic leh Juan Cuadrado chu hmatawng zinga an tel ang.

Juventus defender Giorgio Chiellini pawhin, "Thil thleng tawh avangin kan kun mai dawn lo a, Madrid-ah hian football ṭha tak khel turin kan zin ang," tiin a sawi.