Goal ropui bawk kha

Juventus Stadium-a inkhel khaikhawmna ṭha tak chu Cristiano Ronaldo goal a ni a. Real Madrid forward hian feet 9 leh inches lia a sang awm ball chu bicycle kick hmanga petin goal ropui a khung a, goal hian Spanish club chungnun zia a pholang.

Ronaldo fakna chu kil tin aṭangin a chhuak a, Real manager Zinedine Zidane leh Juventus manager Massimiliano Allegri ten goal ropui sawi zui nan an ṭawngkam ṭha na ui lo. Sawi hmaih theih loh chu Old Lady ṭantute pawhin an lama goal lut hi goal bik a nih miau avangin an lawmpui hial.

Portugal captain hian kartawpa Madrid Derby-ah pawh goal mawi a khung leh a, 1-1 a nih laiin minute 64-naah lakchhuah a ni a, Juventus nen Champions League-a an inkhel tur hi an la dah pawimawh hle.

Ronaldo hian tun season Champions League-ah goal 14 a khung tawh a, top scorer ni mekin amah hnai bertu Sevilla striker Wissam Ben Yedder (8 goals) tan phak ngaihna a awm tawh lo niin a lang a, English club goal khung khawl pahnih Harry Kane (7 goals) leh Mohamed Salah (7 goals) te khung let khung mah se a la duhkhawp lo.

Real forward hian tun season-ah goal 40 a khung tawh a, league-ah goal 23 a khung a, Club World Cup-ah goal hnih khungin Supercopa de Espana-ah goal khat a khung tawh bawk. Kum 33 mi ni tawh mah se Juventus tan ven uluk a ṭul ang.