Manager hlawhtling Capello a chawl

Fabio Capello chuan Italy team naran enkawl châkna a neih loh thu a sawi a, coaching hna a chawlhsan thu a puang.

Italian manager chuan, "England leh Russia-ah te hna ka lo thawk tawh a, vawi khat dang thawh leh ka duh a, Jiangsu hi ka tawpna chu a ni ta. Ka duh ang zawng zawng ka ti a, ka thawh danah ka lungawi," tiiin a sawi.

Kum 71 mi Capello hi March thla khan a club enkawl Chinese club Jiangsu Suning nen thla kaw hnuah inhriatthiam tawnnain an inṭhen a, result ṭhat loh vang a ni.

Jiangsu hi kum 2016 khan league-ah pahnihna an ni a, season bul an ṭan fuh loh hnuin Italian manager hnuaiah hian team 16 awmna league-ah table mawngphah aṭangin 12-naah an inhlang chho. Tun season-ah match thumah vawi hnih an chak lo a, hemi zawh hian Capello hian a hna a chan ta a ni.

Capello hi Italy team enkawl tura sawi rik a ni a, amaherawhchu Italian manager chuan, "Coach zawng zawng hi player ṭha an neih chuan an ṭha a, team naran neih chuan a harsa ṭhin. Tun dinhmunah chuan kan ram hian player ṭha bik kan nei lo a, team hruaitu leh danglamna thlen thei kan nei lo," tiin Azzuri a enkawl châk loh chhan a sawi.

England manager hlui chuan sawi chhunzawmin, "Mancini hi tawnhriat nei ṭha tak a ni a, khawvel hmun hrang hrangah a kal tawh. Amaherawhchu player neih ṭhat loh vang thoin harsatna a tawk ang. Ronaldo emaw Messi emaw neih chuan goal khata hmahruai sa ang an ni a," tiin player ṭha danglamna a sawi lang.

A kalna tur sawiin Capello chuan, "Tunah chuan inkhel chungchang TV kaltlanga sawi chhoh ka tum a, he hna hi chuan chak loh a awm ve lo," tiin a sawi.

Capello hian player a nih laiin hlawhlting takin Roma, Juventus leh Milan tan a khel tawh a, coach a nih hnuah pawh Milan, Real Madrid, Roma leh Juventus te hlawhtling takin a enkawl bawk.