Indian Super Cup Semifinal luh inchuh tur Bagan leh Shillong
Indian Super League leh I League club te inelna Indian Super Cup quarterfinal pahnihna chu vawiin tlai dar 4:00 hian khelh a ni dawn a, Mohun Bagan leh Shillong Lajong an intawng dawn.
Super Cup quarterfinal match hmasa berah East Bengal chuan 1-0 in Mizo club Aizawl FC an lo hneh tawh a, Bagan-in an hmelma kumhlun East Bengal thlen chin pawh thleng loa Super Cup hmasa ber mangṭha an duh lo ang.
Vannei Bagan?
I League club tam zawkin Super Cup-a an match hmasa berah budget tam zawk ISL club an hmachhawn nghal hlawm a, Bagan-in I League lamah pawh team nem pawl Churchill Brothers hmangin bul an ṭan thung.
Bagan hian I League top scorer Aser Pierrick Dipanda goal hnih hmangin Churchill Brothers hi 2-1 in an hneh nghal a, quarterfinal-ah pawh I League club bawk an tawng dawn. Hriatchian sa team tum zel hi Bagan coach Shankarlal Chakraborty tan chuan 'malsawmna' a chhiar loh a harsa ang.
Mahse maw...
Bagan-in Lajong an hmachhawn dawn avangin lawma kut beng mai tur erawh an ni lo. Meghalaya club hian I League-a parukna nichungin Super Cup khel mah se round of 16-ah team
ṭha zawk nia ngaih Pune City chu 3-2 in an hneh thei.
Budget leh player aṭanga thlir chuan Pune-in chak tura ringtu an ngah zawk ngei ang. Mahse, Lajong neih ve erawh huaisenna, tih tak takna, beih hram hramna leh rilru paukhauh a ni a, heng zawng zawng intelkhawm hi Pune-in an ngam lo.
Thawnthu hlui chu
I League khelh zawh takah khan Lajong leh Bagan hi vawi hnih an inkhel a, Kolkata club chu a chungnung zawk an ni. Bagan khelmuala team pahnih intawn hmasakah 1-1 in an inhnehtawk a, Lajong khelmualah Kolkata club-in 3-0 in hnehna an chang thung.
Vawiina team pahnih intawnna erawh Kalinga Stadium, Bhubaneswar-a ni a, tlangnel sa an awm bik lo. Bagan-in I League nomawi chawi loh thup bo nan Super Cup nomawi chawi ngei an duh a, Lajong captain Samuel Lalmuanpuia'n, "A tikimtu nih kan tum lo," tiin thlen san an tum thu Vanglaini a lo hrilh tawh bawk.
Lajong hretu Dicka
I League-ah Aser Pierrick Dipanda Dicka a langsar a, Super Cup-ah pawh a khelh ṭhat a chhunzawm zel. Valencia B team tana lo khel tawh striker hian I League hman zawh takah khan goal 13 khungin a khung hnem ber a, 2016-17 season khan Lajong tan khelin top scorer a lo ni tawh bawk.
Cameroonian striker-in Lajong a hrechiang dawn tih a langchiang–tun season I League-a vawi hnih an intawnah pawh goal hnih a khung a, zaninah a club hlui velh nawn a tum ang.
Hei le Samuel
Bagan-in Dicka an neih an inchhuanpui dawn a nih chuan Shillong Lajong-in Samuel Lalmuanpuia an nei ve tho. Zemabawk North rawlthar hian kum 19 mi lek nichungin kuminah Shillong club tan captain armband a hreng a, inkhel boruak sangah pawh zo takin a mawhphurhna a hlen ṭhin.
Samuel hian I League khelh zawh takah khan match 17 khelin goal thum a khung a, assist vawi nga a nei–a goal khung zinga pakhat hi Bagan lama penalty hmanga a khung a ni a, I League Emerging Player of the League-ah hial thlan a ni.
Set piece leh Samuel
Samuel-a'n Lajong tan set piece zawng zawng a pet a, set piece pet thiam bik a nihzia Indian football hrechiangtu ten an hai lo. Hei hi Bagan coach Shankarlal pawhin Lajong nena league-a an intawn dawn ṭumin a hria a, "Samuel hi India-a set piece pet thiam ber a ni," a ti hial.
Lajong captain hian Super Cup-a an match hmasa berah Pune lamah penalty hmangin chakna goal a khung a, hero of the match-ah thlan zui a ni. Penalty a pet hian hun pek belh a ni tawh a, 2-2 in an inhnehtawk bawk–he rawlthar hian boruak sang karah buaina a nei lo tih tarlang teltu a ni nghal.