Salah um phak inbeiseitu Kane

Premier League-a goal 24 khungtu Harry Kane chuan a aia goal ngaa khung hnem zawk Mohamed Salah a umphak theih a inrin thu a sawi a, Premier League-ah golden boot inchuh boruak a sang.

Tottenham Hotspurs striker chuan, "Match khelh tur a la awm nual avangin top scorer ka nih theih ka ring," a ti. Spurs-in match ruk chiah khelh tur an nei tawh a, Liverpool-in match nga an khelh a la ngai thung.

Spurs-in Kane-a'n golden boot a dawn ngei theih nan hma a la nghal a, 2-1-a Stoke City an hnehna inkhela Christian Erik­sen goal khung pahnih zinga hnu­hnung zawk chu Kane-a khung niin an sawi - Premier League hotute hnenah hei hi an thlen.

Kane-a goal chu
Bet365 Stadium-ah Totten­ham-in 2-1 in Stoke City an hneh a, an goal hnihna hi Christian Eriksen-a'n freekick hmanga a chhuih luh a ni. Mahse, Spurs chuan Danish midfielder freekick hian Kane-a tawk fuh niin an sawi a, Kane-a goal anga chhiar turin Premier League-ah an thlen.

Kane chuan, "Ka fanu hming chhalin ball kha ka tawk fuh ngei tih ka sawi duh a, mah se tih theih erawh engmah ka nei lo. An duh chuan ka goal angin an pawm leh thei a, anih angin an kaltlangpui thei bawk. A pawimawh ber chu hnehna kan chang kha a ni," a ti a, goal-in a rilru a kap tih erawh a lang.

Premier League chuan goal hi an zirchiang leh ang a, pawm a nih chuan English striker hian goal li chauhin Salah a phak tawh dawn lo tihna a ni.

Mi ropui sulhnu
Arsenal striker ropui Thierry Henry chu Gunners vanglai khan season thum chhung a zawnin Premier League top scorer a lo ni tawh a, French striker hnuah hetiang dinhmun luah leh thei an la awm lo.

Kane hian 2015-16 (25 goals) leh 2016-17 (29 goals)-ah te top scorer dinhmun a luah tawh a, kuminah top scorer a ni leh thei a nih ngat chuan Henry hnua season thum chhung a zawna top scorer ni leh thei hmasa ber a ni dawn tihna a ni.

Kum 24 mi striker chuan, "Striker ka nih miau avangin golden boot dawn nawn chu ka duhthusam a ni. Chu dinhmun luah tur chuan tun aṭanga season tawp thlengin ka bei dawn a ni," a ti.

Salah, i sang lua a ni
Kane-a'n golden boot hlawh­chhuah tum viau mah se Salah umphak hi thil awlsam a ni dawn lo. Stoke laka an goal hnuhnung zawk kha Kane goal anga pawm sak pawh ni se top scorer ni tur chuan Salah-a'n goal a khung tawh miah loh a, match rukah anin goal nga a khung a ngai thung ang.

March Premier League Player of the Month atana thlan hlim Salah hian Premier League-ah goal 29 a khung tawh a, assist vawi kua a nei bawk. Egyptian forward hian heti zat goal khung tur hian target-a shot 97 a neiha 60 chu goal zawnah a pet a, minute 2483 khelmual chhungah hun hmangin minute 86 dana goal khat zel khung ang a ni.

Kane-a'n goal 24 khung tawhin assist vawi hnih a nei a, heti zat goal khung tur hian khelmualah minute 2548 hun hmangin minute 106 danah zel a khung. Kane-a'n Salah aiin shot a ngah zawk a, vawi 119 shot a neihah vawi 67 chu target-ah a pet - heta ṭanga chhut chuan Kane aiin Salah ke a hmuingil zawk.

Aguero a hla lo
Manchester City Striker Ser­gio Aguero chu a thiam ngaiin a la thiam reng a, league goal 21 a khung tawh. Argentine striker hian Kane aiin khung tlem mah se khelmuala an hun hman zat aṭanga chhut chuan Aguero-a'n goal a khung zing zawk.

Atletico Madrid striker hlui hian khelmualah minute 1969 hun a hmang a, Kane-a'n minute 106 dana goal a khung laiin Aguero erawhin minute 94 danah a khung thung - assist vawi ruk a nei bawk.

Aguero khelhpui Raheem Sterling-a'n goal 16 a khung tawh a, Leicester City striker Jamie Vardy-a'n heti zat bawk hi a khung ve bawk. Salah-a'n goal 29 a khung tawh miau avangin Aguero, Sterling leh Vardy tan erawh top scorer nih beisei a harsa tawh ang.