Torres-a'n Atletico chhuahsan dawn

Atletico Madrid 'Fapa rangkachak' tih hiala hminglem an pek Fernando Torres chuan amah siam liantu club chu season tawpah a chhuahsan tur thu a puang. Kum 34 mi striker hi nipui transfer-ah chuan a contract a zo tawh dawn, Madrid khaw club tan a khel phak tawh meuh lo.

Torress chuan, "In hriat vek angin khelmualah hun ka hmang tlem em em a, tun season hi he club-a ka hun tawp ber tur a ni tawh dawn a ni. He thu hi keimaha pai reng ai chuan fan-te hrilh thuai hi ka mawhphurhnaah ka ngai a, thutlukna awlsam a ni lo.

"A vawi hnih nana Atletico ka mangṭha leh tur hian minti lunghnur takzet. He hmuna inkhelh chawlhsan hi ka duh fo ṭhin a, kum hnih, thum emaw nga thleng pawhin ka la inkhel thei turah ka ngai a ni," a ti a, amah siam liantu club-ah football mangṭha duh mah se a la inkhelh duh bawk si avangin a duhthusam ram a hlawhtling thei ta lo.

Atletico chuan May 20-a tun season-a an khelmuala an match hnuhnung ber an khelh hunah Torres chawimawina an neih tur thu an sawi a, an hun hman tur hi hriatreng tlak a nih tur thu an sawi.

Club president Enrique Cerezo chuan, "Fernando hi kan club tan chuan legend a ni a, Atletico chuan a tan kawng a hawng reng a ni. He hmun hi a In a nih miau avangin a hmalam hun chu ama duhthlannaah a innghah thu kan sawi fo tawh ṭhin.

"Chutihrual chuan club danga khelh a duh a nih pawhin kan tana a hnathawh zozai avanga lawmthu sawi mai tur kan ni," tiin an 'fapa rangkachak' a chawimawi thiam hle.

Spain tan vawi 110 inlana goal 38 khungtu striker hian 2007 khan a vawi khat nan Atletico chhuahsanin Loiverpool a pan a, Chelsea leh AC Milan-a a khelh leh hnuah 2014-15 khan Atletico Madrid hi a zawm leh a, Madrid khaw club tan hian goal 126 a khung.

Torres hian tun season-ah goal sarih a khung tawh a, Euro nomawi pahnih, World Cup leh Champions League nomawi a chawi tawh.