Sania Mirza leh Vaidyanathan hnung zuitu Raina

Thawhṭanni khan hmeichhe tennis thuneitu sang Women's Tennis Association chuan ranking thar a ti chhuak a, India nula Ankita Raina chuan point 274 hmuin 197-na a ni a, a ranking hmasa aiin step 15 zetin hma a sawn chho a ni.

Indian tennis star zingah world number 27 hlui Sania Mirza (2007) leh, world number 134 hlui Nirupama Vaidyanathan (1997) te chu a sang zual 200 zingah an lo tel tawh ṭhin a, anni pahnih tih lohah chuan Raina hi top 200 hunga inhlangkai leh thei hmasa ber a ni ta.

Kum 25 mi Raina chuan, "Hniam leh san lai ka nei fo a, a bik takin 200-250 inkarah ka awm ngun ta hle. Hmasawn tur hian ka thawkrim a, dawhtheihna neih ngah pawh a ngai hle. Grand Slam khelh ka chak a, tuna ka tum hmasak chu a sang 150 zinga tel niin, season tawpah chuan a sang 100 zingah tel ngei ka tum ang," tiin a sawi.

Ahmedabad nula Raina hi ranking 200 huangah a inlan phak tak avangin WTA 125 series hoah chuan qualifier khelh ngai loin a tling nghal. Grand Slam main draw khel tur erawh chuan top 100 huangah awm a ngai a, a hnuai lam tan qualifier khelh a ngai ṭhin a ni.