Zaninah hming ṭhat inchuhna
Aizawl FC chuan zanin dar 6:30 hian Bangladesh club Dhaka Abahani FC chu Indira Gandhi Athletic Stadium, Guwahati-ah an mikhual dawn.
AFC Cup-ah Santosh Kashyap-a kaihhruai team hi Bengaluru FC, New Radiant leh Dhaka Abahani te nen group khatah an awm a, Aizawl FC leh zanina an khingpui tur hian match hnih khelh tawhah point an la hmu lo a, hmingṭhat inchuhna a ni thei ang.
Mizo club hian season liam taa I League-a an champion avangin tun season-ah AFC Champions League playoff an khel a, I League an ṭan hma avangin Mizoram Premier League tawp lam nen inkhelh hun a inrual chho a, an squad a chhah tawk loh bawk avangin beisei ang result an hlawh chhuak lo.
ISL club leh I League club te tana buatsaih AIFF Super Cup-ah pawh Aizawl FC hian ISL champion Chennaiyin hnehin bul ṭan mah se AFC Cup nen an khelh kawp avangin thahrui an ngah tawh lo a, quarterfinal-ah East Bengal hneh loin an tla.
AFC Cup-ah hian harsatna belhchhah turin ISL club aṭanga loan hmanga an hawh Lalchhawnkima leh H. Lalmuankima te an chhawr thei lo a, Mizoramah AFC Cup thleng phak khelmual ṭha a awm loh avangin Guwahati-ah home match an khel a, Asian rama inelna sang bera point an hmu lo a nih pawhin an thlen chin hi Mizo club tan a sang hle.