Mizo player ṭha ber thlang leh dawn

Tualchhung volleyball inelna lian leh ngaihhlut ber RS Traders Pro Volleyball League khelh mek a ni a, inelnaah hian Mizo player ṭha ber thlan a ni leh dawn a, KT Enterprise, Ramhlun North chuan Panasonic LED TV an pe ang.

Season hmasa khan Lalbiakmuana'n Hunthar Veng chu nomawi a chawipui, Mizo Best Player atana thlan hmasak ber a ni. Kuminah Biakmuana hi kai thar Durtlang North tan khelin, an thlen chinah season hmasa ang em em chuan a la kal fawr rih lo.

Tun thlenga PVL khelh chinah chuan Mizo hlanga khel TNT rinrawl Lalramnunfela a langsar a, an khelh tawh chinah Mizo player zinga che ṭha bera ngaih a ni. Chutihlaiin TNT spiker Sadraka leh Anastasia, Electric Veng player Vanlalṭanpuiate chu championship kal meka Mizo zinga RFL Plastic Player of the Night-a thlan tawh an ni ve thung.

PVL hi league round khelh zawh a la ni lo a, hemi hnuah semifinal leh final khelh zui leh tur a la nih avangin Mizo player-te tan lawmman dawng tura dinhmun sawhnghehna hun a la inhawng mek a ni.