Buaina kan nei - Conte

Premier League champion lai Chelsea an che fuh hleithei rih lo a, fan-te ngei pawhin an auel hial ta; manager Antonio Conte chuan harsatna an neih thu a sawi chhuak.

Chelsea hi league table-ah pangana an ni mek a, palina Tottenham aiin point 10 zetin an hniam zawk. League match vawi ruk bak khelh tur a awm tawh loh avangin season thara Champions League khelh beiseina a tlahniam tawh hle.

Pathianni zan khan Blues hian Stamford Bridge-ah West Ham an mikhual a, London derby-ah goal khat ve ve khungin chak zawk an awm lo. Season an hman danah Chelsea ṭantute an lawm lo a, an coach leh player an auel hial.

Chelsea manager Conte chuan, "Hammers laka kan chak zo lo kha chu a pawi takzet. Tun season chhungin inkhel thunun leh hnehna chan phu taka awm siin, point thum hmuh loh ṭum kan ngah hle. Hetiang thil a thleng a nih chuan eng emaw lai berah harsatna leh buaina kan nei tih a chiang," tiin a sawi.

Italian manager chuan sawi zawmin, "Kan beisei ang result kan neih theih loh chuan eng nge a chhan tiin kan ngaihtuah nawn fo ṭhin a, a chhanna kan neih thuai pawh a ngai. Kan elpui ten an khel ṭhain goal khung an harsat lo a, an chetsual tlem avangin a sang pali zinga tel chu a harsa tawh dawn, mah se thil tih theih loh chu a ni lo ang," tiin beiseina an la neih thu a sawi.

Blues hian league nomawi an kawl lai chu Manchester City lakah an chan ngei dawn niin a lang tawh a, Champions League leh League Cup an chawi lo chiang tawh bawk. Season duhawm lo an hman mek hliahkhuhna tur atan FA Cup hmabak an la nei.