Djokovic-a'n coach la nei lo

World number 1 hlui Novak Djokovic chuan Imaz Academy, Spain-ah training a nei a, tun hma lama a coach ni tawh ṭhin Marian Vajda chuan a hmunah kal chilhin a training pui.

Grand Slam vawi 12 champion tawh Djokovic hi a coach Andre Agassi nena inṭhen hlim a ni. Serbian tlangval hi a coaching team zinga tel sa Radek Stepanek nena thawkdun chhunzawm tura ngaih ni mah se Stepanek nen pawh an thawhdunna an ti tawp zui bawk.

Coach nghet nei loa awm lai Djokovic leh Vajda te an training dun lai hmuh ni mah se inremna an la nei lo. Djokovic-a thupuangtu chuan, "Marian kha Novak pui turin a rawn kal a, tun thleng chuan engtiangin nge an thawhdun zel dawn tih inremna a la awm lo," tiin a sawi.

Kum 30 mi Djokovic hian kuminah beisei ang result a la nei lo. A kiu hliam a dam hnuah inelna a hmachhawn leh ṭan dawn a, April 14-22 chhunga khelh tur Monte Carlo Masters-ah a inlan ang.