Sunrisers tan Royal an 'cial tawk lo

Indian Premier League-ah Sunrisers Hyderabad an vul a, Thawhṭanni zan khan Rajasthan Royals chu wicket kua ngawtin an sawp.

Rajasthan Royals an bat hmasa zawk a, an beisei angin inkhel a awlsam lo. D'Arcy Short chu ball li chiah a hmachhawn hman tihin over 0.6-ah a out nghal ringawt a, a dinpui captain Ajinkya Rahane (13 runs)-a'n a zui har lo.

Over 20 a zawh meuh chuan Rajasthan club hian run 125 chiah an siam a, wicket kua an hloh–run 49 vaw chhuaktu Sanju Samson awm lo phei se chuan an mualpho lehzual ngei ang.

Sunrisers Hyderabad bat hun a thleng a, over 1.3-na lekah Wriddhiman Saha (5 runs) out ve nghal mah se Rajasthan club lawmin an au zui tawh lo.

Shikhar Dhawan chuan ball 57 lekah run 77 vaw chhuakin a tawp thleng a dam a, run 36 siamtu captain Kane Williamson pawh a tawp thleng damin Dhawan a thlawp ṭha hle.

SHR hian over 15.5 lekah an target an umpha a, wicket khat chiah an hloh. Nizan khan Chennai Super Kings leh Kolkata Knight Riders an inkhel a, he thu buatsaih a nih lai hian an result kan hre hman lo.