London Stadium-ah ennawm hmuhnawm Ronaldo, Lingard & De Gea

Pathianni zanah Manchester United-in West Ham 2-1 in an hneh a, thil thlen dan chu lemchan thawnthu ngaihnawm bik ang mai a ni. Ole Gunnar Solskjaer-a hoten hlimna vawrtawp an chang a, West Ham erawh lungngaiin an indawm kun thung.

London Stadium-a inkhel hi Premier League match pakhat ve mai a ni a, thil thlen dan erawh a danglam hle. Hammers-in Said Benrahma hmangin hma an hruai a, Cristiano Ronaldo hmangin Man United-in first half-ah vek siphurh an sut.

Minute 89-naah Jesse Lingard-a'n a club hlui lamah chakna goal ropui a khung a, ennawm erawh a la zo lo. West Ham-in injury time-ah penalty an hmu a, David de Gea chuan penalty pet tur liau liaua lut Mark Noble-a penalty a dansak.

Moyes vs Ole
Manchester United-in kum 2013 khan Premier League club ropui bera siamtu Sir Alex Ferguson an thlah liam a, Scottish manager David Moyes lalutin 'The Chosen One' hming an vuah hial. Moyes hian beisei a pha lo a, season khat pawh a daih lo.

Kum 58 mi Moyes hi a tlu hlen lo a, West Ham-ah hming rawn chher chhoin London club hi Europa League hial a khelhpui. Old Trafford-a Moyes a hmun kalsan hi Louis van Gaal leh Jose Mourinho ten an luahlum thei bik lo a, Man United-in 1999 Champions League final-a chakna goal khungtu Solskjaer chungah rinna an nghat.

Moyes tan Man United-a hlawhchham kha mangchhia a ni a, amah thlaktu Solskjaer-a enkawl hneh loh hi a belhchhahtu a ni thei ang. Pathianni zan inkhelah Hammers-in fimkhur takin inkhel bul an ṭan a, tlawm an tum lo. Man United khel ṭha zawkin lang mah se Moyes-a naute an nawr ngam hnuah erawh West Ham goal bawh a na zawk.

Hammers tan Jarrod Bowen-a'n chance ṭha ṭum hnih a hlah a, minute 30-naah goal a lut ta nge nge. Mual ding lamah Hammers-in Pablo Fornals, Vladimír Coufal leh Bowen te hmangin Man United tlarhnung an ṭhiat a, mual laia awm Benrahma a pe. Algerian midfielder Benrahma hian box pawn aṭanga petin Raphael Varane a per hnuah goal-ah a lut.

Ronaldo hun
Goal luh hmain Ronaldo leh Bruno Fernandes ten chance an nei a, goal luh hnuah pawh Portuguese player pahnih bawk an ṭangkai. Minute 35-naah Fernandes vawrh luh chu Ronaldo-a'n goal-ah a pet a, keeper Lukasz Fabianski-a'n dang perin Man United forward hian awlsam takin a khung.

Portugal captain hian Man United-a a let leh hnuah match thum khel tawhin goal li a khung a, vanneih zan ni se hei aia tam khung thei tur a ni. Mahse, referee Martin Atkinson-a'n penalty ṭum hnih a pe lo. Ronaldo hi box chhungah Coufal leh Kurt Zouma ten box chhungah an ti tlu.

Lingard hun
Man United-in Champions League-ah Young Boys an hneh lo a, mawhphurtu chu Jesse Lingard a ni. English midfielder hian Young Boys chakna goal tur a siamsak a, a mualpho hle.

Solskjaer-a'n Lingard chungah rinna a nghat tlat a, goal mamawh laiin a club hlui West Ham lamah a luhtir. Minute 89-naah Nemanja Matic pass chu Lingard-a'n box chhungah changin Zouma venna hnuaiah petna tur hmun awl a insiam a, goal kilah tak a lut.

Goal ropui bik a nih avangin Lingard tan goal khung lawm a châkawm ngei ang. Mahse, West Ham hi season liam taa hlawhtling taka a khelhna a ni miau a, Lingard-a'n a goal khung a lawm lo. Champions League-a zero Lingard kha Premier League-ah chuan hero a ni.

De Gea a hun
Spanish keeper David de Gea-a'n beisei a phak loh ṭhin avangin season liam ta tawp lamah phei kha chuan Dean Henderson a tluk lo hman hial. Henderson-a'n Covid-19 a vei zarah De Gea tan hun ṭha a inher chhuak.

Injury time-ah Hammers substitute Andriy Yarmolenko cross chuan Luke Shaw kut a per a, referee Atkinson-a tan penalty pek mai loh chu tih theih dang a awm lo.

De Gea hian October 5, 2014-a Leighton Baines-a penalty a dan hnuah Premeir League-ah vawi 21 penalty hmachhawn leh mah se pakhatmah a dang lo. Hei chauh hi a ni lo, Europa League final-a Villarreal nen penalty shootout-a an inhmachhawn ṭumah vawi 11 hmachhawnin a chhuah vek.

David Moyes chuan Mark Noble a luhtir a, Hammers midfielder hian penalty vawi 32-ah vawi 27 a pet goal a, 84.4% goal-ah a chantir a, Premier League history-ah goal a chantir hnem palina a ni pha.

Kum 34 mi Noble hian ball a vawi khat khawihnaah penalty a pet nghal a ngai a, a hmaah 'hmingṭhatna' a awm. Mahse, De Gea-a'n Noble-a penalty pet a dansak a, hmingṭhatna a chang ta zawk.

Engkim kha a mak. Declan Rice kha ball nen ka hmu a, a hnuah Mark Noble ka hmu ta thut. Mak chu ka ti deuh a, mahse penalty specialist a ni miau. Mahse penalty ka dansak a, point thum kan hlawh chhuak.
- David de Gea, Man United keeper

A record kan thlir chuan a ṭha em a ni. Inngaihtuahna hun ka nei a, thutlukna kha siam ta lo ila, ka inchhiar zawk ang.
- David Moyes, West Ham manager (Mark Noble hian a penalty pet hnuhnung vawi 10-ah vawi 10 a khung)

Tun aiin goal kan venhim ṭhat a ṭul. West Ham-in goal an khung khan kan inrem dan a dik lo a, kan insiamṭhat a ṭul. Chutihrualin point thum hmuh hi kan phu a, he point hian danglamna a thlen theih ka beisei. Nomawi chungchang chu April leh May-ah a sawi theih chauh ang. - Ole Gunnar Solskjaer, Man United manager