League Cup: Liverpool leh City inlan dawn

English football-a inelna ngaih-hlut hlawh zinga mi League Cup third round chu zaninah khelh a ni dawn a, Premier League club langsar zingah Liverpool leh Manchester City an inlan dawn.

Liverpool chuan zanin dar 12:15-ah Norwich City an lenchilh dawn a, Premier League club pahnih inkhel tur an nih avangin zanin inkhel turah chuan ngaihven an hlawh ber ang.

Manchester City chuan zanin dar 12:15-ah Wycombe Wanderers an mikhual dawn bawk a, anni hi League One club an nih avangin City tan hna a awlsam tura ngaih a ni.

Third round
League Cup hi English football league leh Premier League club-te inelna a ni a, first round-ah hian League Two club 24, League One club 24 leh Championship club 22, an vaiin 70 an inel ṭhin a, first round-a chak team 35 chu second round-ah Premier League club 13 leh Championship club pahnihin an lo zawm ve leh ṭhin.

Premier League club 13 hi Euro-pean football inelna hmachhawn lo ho an ni a, Championship club pahnih hi a hma season Premier League-a 18 leh 19-na te an ni - kuminah chuan Fulham leh West Bromwich Albion tihna a ni.

Third round-ah hian European football khel Premier League club pasarih leh second round-a chak zawk team 25 te chu an intawng leh a, third round-a chakte hian round of 16 an lut ve leh ang.

Player siksawi
Jurgen Klopp-a'n league match hnuhnung berah Crystal Palace an sawp hmain a team a siksawi tur thu a sawi a, rin loh taka bul ṭan an awm nual. German coach hian inkhelh zawhah hriatthiam theih tak turin thusawi a nei zui a, team siksawi a chhunzawm dawn niin a lang.

Nimin khan Klopp hian press conference pawh hmachhawn loin assistant coach Pep Lijnders chuan Norwich an hmachhawn tur chungchangah media a hmachhawn a, German coach hian Norwich nena an inkhel tur a ngai thutak tawk lo.

Hliam vanga chawl mek Thiago Alcantara chu Lijnders-a'n match hnih tal a la chawlh tur thu a sawi a, Trent Alexander-Arnold, Roberto Firmino leh Neco Williams te an la inlan thei dawn lo a, Mohamed Salah leh Sadio Mane pawh an chawlh hahdam a rinawm zawk.

Liverpool an vanduai?
Premier League club tam zawkin division hniam lama awm club an tum a, Liverpool-in top flight league an khelhpui an tum tur hi an vanduai tiin sawi theih a ni a, Norwich khelmuala inkhel tur an ni bawk.

Chutihrual chuan Liverpool hian tun season-a an league match hmasa berah Norwich City hi 3-0 in an lo sawp tawh a, hemi hnua league match li an khelhah an tlawm vek - League Cup second round-ah Bournemouth chu 6-0 in an sawp thung.

Mahse, Liverpool fan-ten Norwich laka tlawm tur chuan an indah phal lo ang tih a chiang a, inelna zawng zawnga champion tum ngam turin Reds squad a chhah tawk em, tih chu zaninah hrilhriatin kan awm ang.

Rawlthar nen City
City-in League One club Wycombe an mikhual dawn a, coach Pep Guardiola chuan player naupang zawkte a chhawr tur thu a sawi - a chhan erawh player inhliam a ngah vang a ni thung.

Pep chuan, "John Stones, Aymeric Laporte, Oleks Zinchenko, Rodri leh Ilkay Gundogan te an inhliam vek a, academy player-te tan inzirna remchang tak a ni ang - chuvanga kan zinga awm pawh an ni," a ti a, academy player a chhar nual tur thu a sawi.

League One club an nih miau avangin Wycombe-in player langsar sawi tur an nei lo a, Etihad Stadium-a lenluh ringawt pawh hi an tan chuan thil lawmawm a tling dawn.

Hmabak hautak
City-in tun hnaiah result an nei ṭha lo. Southampton nena league match an khelh hnuhnung berah goal an khung thei lo a, point khat an hlawh chhuak hram - Chelsea, Paris Saint-Germain (Champions League) leh Liverpool an hmachhawn zui dawn.

Pep-a leh a naute tan hmabak a hautak tih a chiang a, a awlsam dawn lo. City boss chuan, "Kan game khelh tur la hmabakte ngaihtuah chungin player ṭhenkhat chu chawlh hahdamna hun pek an ni ang.

"Ruben Dias leh Joao Cancelo ten tun season-ah minute zawng zawng an la khel vek a, chawlh hahdam an mamawh a ni," a ti a, City fan-te tan academy player-te hmuh a beiseiawm zawk.