Poch-a'n Lionel Messi a la chhuak!
Lionel Messi chuan a club thar Paris St-Germain tan an mual Le Parc des Princes-ah ngei mai a match hmasa ber a khel a, mahse minute 76-naah thlak a ni; khelmual a chhuahsan dawnin Messi hi a lungawi lo tih a hmelah a lang.
PSG hian hun tawp dawna Mauro Icardi goal hmangin Lyon 2-1 in an hneh hram. Ligue 1 match ruk an khelh tawh chinah an la chak vek, record duhawm tak an neih ai chuan Messi chungchangin sawi zui a hlawh zawk.
September 22, Nilaini zanah Paris club hian league match khel turin Metz an lenchilh zui leh nghal dawn, kar tawpah match khelh tur an neih zui leh bawk avangin player insiksawi a ngai tih chu a chiang - Messi chunga tla a nih avangin an sawi zui bik hi a mak lo.
Chak hram
Champions League khel chau Paris St-Germain lamin goal khung an harsat - Messi, Neymar leh Kylian Mbappe bakah Angel di Maria awm bawk mah se hun chanve hma lamah goal an nei thei lo.
Inkhel chawhnu lama che fuh hmasa zawk pawh Lyon an ni. Brazil international midfielder Lucas Paqueta chuan Karl Toko Ekambi a siamsak khungin, minute 54-naah mikhual team zawkin hma an hruai.
PSG lamin na takin an nawr zui a, rawlthar defender Malo Gusto-a penalty chawi chu Neymar-a'n si phurh sut nan a khung, chak tur chuan goal dang an la mamawh; goal an mamawh laiin Messi lak chhuah a ni a, a aiah Achraf Hakimi a lut.
Hakimi bakah striker Icardi chu bench aṭangin a lut bawk, Argentine striker hian hun tawp hma chiahin Mbappe siamsak khungin point thum an hlawh chhuak hram a, point hmuh phu taka khel Lyon tan a uiawm khawp ang.
Messi an thlak
Barcelona captain a ni ṭhin a, an ram Argentina tan pawh captain a ni tho - khelmual chhung bakah a pawn thlengin a thu vet vet thei hle. Player dangte nena khaikhin chuan a dinhmun leh mawhphurhna pawh a inthlau thei viau.
Spanish club lian aṭanga PSG a zawm hnuah match a khel mai lo, international break a awm bakah UCL an khelh avangin anmahni muala league match khel turin ni 40 lai a nghah a ngai hial - fans lamin a inkhel lai en turin an nghah rei a ngai hle.
Paris khawpuiah hian a tir lamah chuan Messi hi a khel ṭha viau, mahse a vannei tawk lo - freekick aṭangin woodwork a tihper. Belgian club nen an inkhelh ṭum pawhin a tih per tawh bawk, a club thar tana a goal hmasa ber khung turin a nghah rih a la ngai.
Messi hi Barcelona tana a khelhpui tawh Neymar nen chuan an inkawp rem leh dawn tih a lang nghal ruak mai a, mahse a ṭhian thar dangte nen erawh nal taka in man tur chuan hun an mamawh dawn tih a chiang.
Poch a insawifiah
Goal mamawh lai takin Messi lak chhuah a ni a, goal khung thiam bik leh goal khung chaka tuihal reng Messi tan chuan thil lawmawm lo tak a ni ang tih a chiang. Kum 34 mi ni tawh mah se a tam thei ang ber inkhelh a la duh tih a hmelah a lang.
Messi thlak tura thutlukna siamtu Pochettino chuan, "Kan squad-ah hian player ṭha tak tak 35 an awm, mahse vawi khatah player 11 bak an khel thei lo, a aia tam luh tir ngawt theih a ni lo. Thutlukna ka siam hi player leh kan vaia ṭha tur ngaihtuah chunga tih a ni.
"Player siksawi chu coach hna a ni a, a changin a hlawhtlin laiin a chang chuan a hlawhtling lo ve thei bawk. Player ṭhenkhatin thlak an duh laiin ṭhenkhat chuan an duh lo, ani pawh eng nge a dinhmun tih ka zawt a, a ṭhat thu min hrilh," tiin a sawi.
Mahni thu duh leh luhlul tak mai Messi hian beisei anga season bul a ṭan loh avangin thil tam tak a ngaihtuah ang tih a chiang, ṭha taka khel chhuak tur chuan thawhhona ṭha a pawimawh a, coach nena boruak ṭha neih chhunzawm a pawimawh ang.