An ramah Bagnaia a chak

Francesco Bagnaia chuan Pathianni tlaia tlan zawh tak San Marino Grand Prix-ah hnehna a chang a, mahni tual zawlah ngei mai hnehna chan chu a lawmawm dan a zual bik ngei ang - championship lamah beisei a nei sang zel bawk.

Kar hmasa mai khan Italian tlangval hian bike intlansiakna sang berah hian hnehna a chang. San Marino-ah pawh a tlan ṭha ber a nih chhunzawm a, championhsip hmahruaitu Fabio Quartarano-a'n na takin um reng mah se a chesual duh bik lo.

Champion lai Joan Mir chu paruknaah a thleng; Suzuki rider hi championship lamah chuan pathumna a ni mek - a chungah Quartarano leh Bagnaia te an la awm, champion tur sawi thiam a la harsa hle.

Italian tlangval Bagnaia chuan, "A tir lamah Quartarano-a'n kawng kawi a la zau zeuh tih ka hria a, thil a awlsam phah dawn niin a lang hman. Mahse, lap hnuhnung 10 bawr velah na taka min nawr kha chu a mangan thlak viau mai," tiin a awlsam loh thu a sawi.

September thla chhung chuan MotoGP a awm dawn tawh rih lo. October 3, Pathianni hian Japanese Grand Prix an tlan leh chauh ang.