Premier League hmahruaitu Chelsea

Chelsea chuan Champions League champion an nihna chu Premier League lamah pawh a takin an lantir zui zel. Thomas Tuchel-a naute hian Tottenham Hotspur chu 3-0 a luh chhuahin table chung berah an awm. Blues chet ṭhat nan German manager Tuchel-a hnathawh a ropui hle.

League match vawi nga khelh tawh chinah Chelsea leh Liverpool sulhnu a inang vek - point hmuh zat, goal difference leh goal khung zat a inang vek. Club pahnih hi Anfield-ah an intawng tawh a, 1-1 in an inhnehtawk - khualmuala goal khung Blues hi a chungah an awm.

Team pahnih hi Stamford Bridge-ah an la inkhel leh dawn, season tluanin an dinhmun hi intluk chho vek ta se, khualmuala an goal khung dan thlenga a inang vek a nih chuan - neutral ground-ah a chungnung zawk tur playoff hmanga zawn a ni ang, hei erawh a thlen a rinawm lo.

Chelsea leh Reds bakah Man-chester United chu tlawm loa season la hmang mek an ni a, season dang zawng aiin nomawi chawi tumin in um an tam dawn niin a lang - champion lai Manchester City pawh sawi bo theih an la ni lo ang.

Goal thum
Pathianni zan Tottenham Hotspur Stadium-a inkhelah a bul ṭan ṭha zawk chu mualneitu lam an ni. Mahse, Nuno Espirito Santo naute hian match hmasa lam ang bawkin goal khung an hatsat, chawlhlawk hma chuan Blues lam tawhin target zawna pet an nei bik lo.

Second half-ah erawh Chelsea an hrang, defender Marcos Alonso-a corner pet chu Thiago Silva chuan chiang zetin a tauh lut a, keeper Hugo Lloris tan dan theih a ni lo - N'Golo Kante-a shot chu Eric Dier-a'n lo dang pialin keeper rin lohna lamah a lut bawk.

Hun tawp dawnah defender Antonio Rudiger chuan chak nemnghehna a khung. German defender bakah hian Silva, Alonso, Romelu Lukaku leh Timo Werner ten hun ṭha an neih an chhawr lo bawk a, goal tam zawk khung thei dinhmunah an ding.

Danglamna Kante
Hun chanve hma lama goal khung theihna remchang hmutu Mason Mount chu thlak a ni a, tawnhriat ngah Kante a rawn lut. France international midfielder hian Spurs lam ball inpe kual tur a chhu chat zung zung a, boruak a thlak danglam chiang hle.

Kante hian goal a khung ngai meuh lo, league match a khelh hnuhnung 49 aṭanga a goal hmasa ber a khung a, lawm (celebrate) chiam dan pawh a hre hran lo, a mize pangngai takin khingpui zahna nen khelmual chhungah a che uchuak ve ngai lo.

Blues hian goal tam zawk khung mah se a mak lo ang. Alonso a khung tur goal line aṭangin an dang hman a, kum 37 mi Silva-a tauh vawi hnihna chu rang zetin keeper Lloris chuan a lo dang hram a, Lukaku ball pek a dawn ṭhat loh avangin Werner-a'n goal khungna chance ṭha chu holam takin a tham raltir.

Spurs an bil
Man City, Wolves leh Watford an hneh a, goal khat vekin an chak. Nuno naute hian hun rei tak hnua Premier League season bul an ṭan fuh ber ṭum an tawng, mahse Crystal Palace (3-0) laka an mualpho hnuah Chelsea an ngam lo hle.

Kane-a'n a ze ngai a la chhuah thei lo, match hnih a khelh loh hnua lo kir Son Heung-min chuan amah vengtu Alonso bum thei mah se keeper Kepa Arrizabalaga a chesual duh lo - Son leh Kane ten season hmasa an boruak an ngai khawp ang.

Spurs hian September 26, Pathianni zanah North London derby khel turin Arsenal an tlawh dawn. Season bul ṭan chhe tak Gunners hian 2-0 a hnehna an chang thei a nih chuan Tottenham hi an tlan pel leh thei der tawh dawn!