Tla thei dinhmunah Juventus an ding

Serie A match li an khelh tawh a, chak la nei miah lo Juventus chu tla hniam (relegate) thei dinhmunah an ding. 1961-62 season hnu lamah Old Lady hian an match hmasa palia chak an neih loh hmasak ber ṭum an tawng.

Pathianni zan khan Bianconeri hi AC Milan nen 1-1 in an inhnehtawk. Allianz Stadium-a inkhelah minute lina leka Alvaro Morata goal khung chu second half minute 76-naah Ante Rebic-a'n sut hram a, goal dang a lut lo.

Massimiliano Allegri-a'n a vawi hnih nana Juve a enkawl lehnaah beisei a phak lo hle. Empoli leh Napoli an ngam lo a, Udinese leh Milan nen an inhnehtawk - Champions League lamah chak mah se Serie A table-a an dinhmun a chhe hle.

Juve manager Allegri chuan, "Milan khan kan inthlahdah karah hun ṭha vawi khat an nei zeuh a, goal khung nan an hmang. First half kan thunun chunga goal khat chauh kan khung kha a pawi ta a ni.

"Player ka siksawi danah tihsual ka nei tih ka pawm, goal ven a ngaih tawh laia goal khung tur chi dah luh kha a fuh lo," tiin an chak zawh loh chhhana mawhphurtu chu amah a nih thu a sawi chhuak.

Goal khata hma an hruai laiin Allegri hian Juan Cuadrado leh Morata te la chhuakin Federico Chiesa leh Moise Kean te a dah lut a, player pahnih an luh aṭanga minute nga pawh a ral hmain goal an chhuah, a hnu lamah Dejan Kulusevski lut leh mahse awmzia a nei tawh lo.

Milan erawh tlawm nei loin an kaltluang zel. Stefano Pioli naute hian point 10 hmuin pahnihna an ni a, champion lai Inter Milan nen an point hmuh a inzat - season hmasa ang bawkin Milan club pahnih hi na takin an inum leh dawn niin a lang.

Serie A inkhel dangah AS Roma chu Hellas Verona lakah 3-2 in an tlawm. Jose Mourinho-a'n Roma a enkawl china an chak lohna hmasa ber a ni a, point kua an neih tawh avangin champion tura rinkai zinga mi chu an la ni phak tho.