Valencia lakah Real an 'comeback'

Minute 85 thleng chu Valencia lakah Real Madrid hnufual mah se a tawp lam, 'a changtupa' chet hunah tak Real an che a, an mikhualna ramah Valencia chu 2-1 in an hneh.

Valencia tan Hugo Duro chuan minute 66-naah goal hmahruai a khung a, mualneitu team lam hian he goal hi an chakpui mai tawh dawn niin a lang hman.

Mahse, Carlos Ancelotti enkawlna hnuaia goal khung thiam thar Vinícius Júnior chuan minute 86-naah si phurh a sut a, Karim Benzema chuan minute hnih hnu lawkah chakna goal a khung zui.

Real-in league match nga khelh tawhah tlawm nei loin point 13 an nei mek a, La Liga-ah hma an hruai. An hnuai chiahah an khelh ang zata point 11 nei Atletico Madrid an awm a, league match thum chiah la khel Barcelona chu nizan khan an inlan a, he thu buatsaih a nih lai hian result kan hre hman lo.

Beisei aia ṭha
Valencia-in Real an mikhual hmain league match li an khel a, tlawm an nei lo - vawi thum an chak a, vawi khat an khingpui an inhnehtawkpui a, an match tawp berah phei chuan 4-1 ngawtin Osasuna an sawp.

Mahse, an mikhual hi Real an nih miau avangin an chungah beiseina tihsan a harsa a, beisei phak baka ṭhain an khel thung. Real goalkeeper Thibaut Courtois-a'n Valencia centre back Gabriel Paulista ball tauh a dante chu pui tak a ni.

Hei chauh hi a ni lo - Maxi Gomez chuan freekick hmangin uiawm takin a hlah a, Portuguese forward Goncalo Guedes chuan a hun ṭha neih a chhawr thei lo bawk.

Khel ṭha zawk na na na erawh chelh reng theih an ni lo. Minute 66-naah Hugo Duro chuan mawi zetin Valencia tan goal a khung a, Real-in an chhanlet lawk theih loh avangin mualneitu an chak mai dawn niin a lang hman.

Mahse maw...
Real-in Valencia an lenchilh hmaa Spanish media ho chaw tui ber chu Carlos Ancelotti enkawlna hnuaia Real-in hma an sawn chakzia a ni a, Valencia laka an tlawm chuan 'King Carlo' tan mualphona a ni dawn.

Mahse, Italian coach kaihhruaina hnuaia harhtharna chang Vinicius-a'n a pu hmingchhe tur a ngaingam lo a, Valencia keeper Giorgi Mamardashvili-a enchhin hnuah minute 86-naah si phurh a rawn sut.

Kum 21 mi Vinícius hian season hmasa khan Real tana a season duhawm ber hmangin match 49-ah goal ruk a khung a, Real jersey nena season khata goal a khung hnem ber ṭum a ni.

Tun season-ah he record hi a khum ngei dawn niin a lang ta - inelna hrang hrangah match ruk khelin goal nga a khung a, Ancelotti hnuaia Vinícius a danglam.

A hming Benzema
Real tan rawlthar duhawm Vinícius-a'n si phurh a sut a, minute 86-na a nih tawh avangin chak tura beisei erawh an harsa - mahse, minute hnih chiah a liam hman a, Benzema a rawn lang.

Brazilian rawlthar Vinicius a phur laklawh a, Benzema tana tauh luh tur a siamsak - French striker-in harsatna nei loin a tauh goal a, tun season inelna hrang hrangah match ruk a khelh aṭanga goal ruk a khungna a ni a, assist vawi nga a nei bawk!

Real tan Vinicius leh Benzema ten goal khat ve ve an khung a, player pahnih hian an goal khung tur an insiamsak ve ve bawk. Madrid khaw club ṭantute tan an player langsar pahnih an inthlawp ṭha hi hmuhnawm a tling ang.

Madrid boss Ancelotti chuan, "An khel chhia emaw, an khel ṭha emaw pawh ni se, theihtawp chhuah ṭhin team ka enkawl a ni," tiin a naute a fak a, an result-ah a lawm hle.