Kohli-a'n captain hna chawlhsan dawn

Virat Kohli chuan T20 World Cup zawhah T20-a India captain hna a chawlhsan tur thu a sawi a, tun season Indian Premier League zawhah Royal Challengers Bangalore captain hna a chawlhsan tur thu a tichiang.

Kum 32 mi Kohli chuan, "Kum kaw chhung hun hlimawm leh hrehawm kan tawng a, zin kawng chhinchhiah tlak a ni. Tun season hi IPL-a RCB tana ka captain-na hnuhnung ber tur a ni," tiin a sawi.

Kohli hian T20 captain hna chu chawlhsan mah se India tan Test leh ODI-ah a la captain dawn. RCB captain aṭanga chawlh a tum chhan sawifiahin Kohli chuan, "Hun rei tak ka inngaihtuah tawh a, keimaha ṭha ber lang chhuak turin hun thawl ka mamawh," tiin a sawi.

India captain Kohli hian kum 2008 aṭang khan Bangalore club tan hian a khel ṭan a, IPL-ah club dang tana la khel lo - captain hna hi kum 2013 aṭangin a chelh ṭan thung.

Kohli chuan, "Club danga khelh tumna kan nei lo a, RCB chiah ka rilruah a awm. IPL-a ka match hnuhnung ber ka khelh thlengin RCB tan ka khel ang," tiin a sawi.

Royal Challengers Bangalore-in Kohli hnuaia an chet ṭhat ber chu kum 2016 kha a ni a, final-ah an chak lo. Nizan khan RCB hian Kolkata Knight Riders an hmachhawn a, result kan hre hman lo.