Goal khung ṭhulh thei lo Haaland

Borussia Dortmund striker duhawm Erling Braut Haaland-a'n goal khung a atchilh laklawh a, goal hnih a khung leh ta - tun season-ah match riat khelin goal 11 a khung der tawh!

Pathianni zan khan Dortmund hian an mikhual Union Berlin chu 4-2 in an hneh a, Haaland-a'n goal hnih a khung bakah Raphael Guerrero leh Marvin Friedrich (own goal) ten an khung bawk.

Dortmund-in inkhelh ṭan aṭanga minute 10-naah an khung ṭan a, Guerreiro chuan mawi zetin goal hmahruai a khung - minute 24-naah Thomas Meunier-a cross aṭanga ball kal chu Haaland-a'n a tauh goal ve leh a, chak tur a chiang tawh.

Goal dang lut loin chawlhlawk hman a ni a, second half-ah pawh Dortmund bawkin goal an khung - Marco Reus-a ball cross chu Friedrich-a'n an lamah a dang lut a, minute 60 pawh a tlin hmain 3-0 a ni der tawh!

Mahse, mahni muala awlsam taka chak tur Dortmund an chesual - Kruse chuan minute 57-naah penalty hmangin si phurh a sut ṭhen a, minute 81-naah Andreas Voglsammer chuan goal khat a khung ve leh bawk.

Hun tawp nan minute kua chiah a awm tawh a, 3-0 a hun rei zawk hmahruaitu team kha 3-2 chiahin an sang tawh - mikhual team Union Berlin lamin beiseina an nei thar a, awlsam taka chak tura ngaih Dortmund tan a harsa thar thut.

Mahse, Dortmund-in Berlin neih ve loh an nei a, a hming chu Haaland a ni. Norwegian striker hian Berlin defender Robin Knoche ven karah goalkeeper Andreas Luthe lo tlan chhuak chu hmuin a volley thut a, mawi zetin chakna goal a khung.

Haaland-a'n goal a khung hian minute 83-na a ni tawh a, si hnih phurtu Berlin tan tho leh turin hun a daih tawh lo - a tawpa fak hlawh chu Haaland bawk a ni a, a chanchin hi kan la sawi dawn chauh niin a lang.

Kum 21 mi striker hian January 2020 khan RB Salzburg aṭangin Dortmund hi a zawm a, German club tan inelna hrang hrangah match 67 khelin goal 68 a khung der tawh.

Dortmund-in league match nga an khelh aṭangin point 13 an nei ta a, match liah chakin vawi khat chiah an la tlawm - khelh zat inangah hmahruaitu Bayern Munich an phak lohna chu point khat chauh a ni.