Celtic an tlawm; Rangers chak bik lo!

Scottish Premiership-ah club lian pahnih an chak zo lo - Celtic-in khualmualah Livingston chu 1-0 in an ngam lo a, Rangers-in an mikhual Motherwell chu 1-1 in an inhnehtawkpui bawk.

Livingston tan Andrew Shinnie chuan Celtic lakah inkhela goal awmchhun a khung a, an chak - Celtic erawh Scottish football-ah khualmualah thla sarih zet an chak lo ta a, inelna hrang hranga an match hnuhnung pangaah vawi khat chiah an chak!

League bikah chuan Celtic-in match ruk khelhah vawi thum chiah chak an nei a, vawi thum an tlawm - kum 23 chhunga league bul an ṭan chhiat ber ṭum an tawng mek.

Celtic coach Ange Postecoglou chuan, "Hlawhtlin kan duh chuan zanin ang inkhelah chuan point hlawhchhuah a ṭul a ni," a ti a, a naute khelh danah a lawm lo.

Rangers-in minute 12-na lekah Fashion Sakala hmangin goal hmahruai an khung a, awlsam takin an chak mai dawn emaw an ti hman - mahse, Kaiyne Woolery chuan minute 66-naah si phurh a rawn sut a, point khat ve ve insemin inkhel a tawp.

Steven Gerrard enkawl Rangers-in hnehna chang zo lo mah se league-ah erawh hma an hruai chhunzawm a, match ruk an khelh aṭangin point 13 an nei - an hnuaiah point 12 nei Hibernian leh Hearts an awm.

Rangers manager Gerrard chuan, "Keimahni lo chu dem tur an awm lo a, point hnih kan hloh a ni," a ti a, an vawi khat tihsual vangin goal an chhuah thu a sawi bawk.