Foxes an che fuh thei lo

FA Cup champion Leicester City-in Premier League-ah bul an ṭan fuh thei lo a, Pathianni zan khan Brighton & Hove Albion lakah 2-1 in an chak lo.

Amex Stadium-a inkhelah Brighton tan Neal Maupay-a'n penalty aṭangin minute 35-naah goal hmahruai a khung a, Danny Welbeck-a'n minute 50-naah a khung belh. Foxes tan Jamie Vardy-a'n minute 61-naah siphurh a sut ṭhen a, an goal bawh na bawk mah se goal dang an khung belh thei lo.

Kum 34 mi Vardy hian Premier League match 250 a khelhna a ni a,a goal khung kha Leicester City tana inelna hrang hranga a goal 150-na a ni bawk. English striker hian mellung pawimawh tak phum mah se result ṭha an hlawh chhuak lo.

Foxes hi Premier League nomawi an chawi hnuah English club ṭha zingah an inhlang chho a, season hnuhnung pahnihah phei chuan panganaah an awm. Tun season-ah erawh match nga khelh aṭangin point ruk chauh an hmu a, beisei an pha lo hle.