UCL semifinal-ah Bundesliga champion

Bundesliga champion Bayern Munich chu tun hnai season kua chhunga a vawi sarih nan Champions League semifinal-ah an inlan dawn. Nilaini zan khan Jupp Heynckes-a nauten an mikhual Sevilla lakah goal khung lo mah se, quarterfinal first leg-ah 2-1 a hnehna an chan tawh tho avangin an tlang.

German champion ni hlim hian Allianz Arena-a an match hnuhnung pahnihah goal ruk ve ve an khung thei. Mahse, Sevilla lakah erawh goal an khung lo a ni satliah ngawt lo a, ball chang tlem zawk ni chungin goal venhim kawngah vanneihna an mamawh tel bawk.

A goal lo
Sevilla midfielder Joaquin Correa chuan Bayern Munich mid­fielder Javi Martinez a tih tluk vangin hun tawp dawnah hnawhchhuah a ni a, player 10 ni chungin hun tawp an hmang. Correa hian goal khung theihna hun ṭha nei mah se bar a tauh per, first leg-a goal khungtu midfielder Pablo Sarabia pawhin a hun ṭha bik neih a chhawr ṭangkai lo bawk.

Bayern Munich striker Robert Lewandowski pawh ni dang angin a vannei bik lo, a tauh goal ngei tur nia lang pakhat chu goalkeeper David Soria-a'n dan sakin; Jesus Navas chuan winger Franck Ribery goal khung tur ṭha zetin a dan sak bawk a ni.

Poland international Lewan­dowski ti tlutu Sevilla defen­der Gabriel Mercado chu hnawh­chhuah a nih loh avangin a vannei hle. La Liga club Sevilla hian an tum ram thleng zo lo mah se, German coach Heynckes-a'n UCL match bika vawi 12 hnehna a chang tluang lai chu an tihtawp sak.

A harsa dawn
Bayern Munich manager Jupp Heynckes chuan harsa takin semifinal an lut tih a pha lo, a thiam pali zingah phei chuan tun aiin a hautak zual sawt dawn tih a sawi.

Kum 72 mi Jupp Heynckes chuan, "Sevilla khan hun ṭha an insiamsak ngei a, chutihrualin inkhel ṭhenkhatah chuan goal chhuah loh a tawk chang a awm ve bawk. Ka naute hnenah pawh goal venhim a tawk thu ka hrilh," tiin, goal khung lo mah se a duhdana an khelh thu a sawi.

European football-ah Bayern hian an khelmualah bik match 21 hnua a vawi khat nan goal an khung lo. Goal khung lo mah se an lama a luh bik loh avangin mellung pawimawh an phun tho, clean sheet vawi 100 an nei tling ta chiah.

Heynckes chuan sawi zawmin, "Semifinal chu a harsa lehzual tawh dawn, Sevilla lakah ka naute an inthununna a ṭha hle a, hrem tawk awm loa semifinal kan khel thei tur hi a lawmawm hle," a ti.

Bayern Munich hian Cham­pions League semifinal vawi 11 an luhna chiah a ni a, anni aia record nei ṭha awm chhun chu vawi 13 lut tawh Real Madrid chiah an ni.

Sevilla tan a na
La Liga table-a pasarihna ni lai Sevilla hi rinkai lo zawk ni chungin Germany-ah an zin. Mahse, Allianz Arena-ah ball possession 54% an nei thei a, an venneih ṭum chu ni se Sarabia leh Correa te hun ṭha neih kha tlangpui tham khawpa uiawm a ni.

Sevilla an tlak zanah champion lai Real Madrid chu an mikhual Juventus lakah an chak thung a, kum 2010 hnua a vawi khat nan semifinal-ah Spanish team pakhat chiah an awm dawn.

Sevilla coach Vincenzo Montella chuan, "Champions League-a sulhnu nei ṭha Bayern Munich hmachhawn kha a awlsam dawn lo tih kan hre lawk. Chuti chung chuan kan khel ṭha em em a, Sarabia leh Correa te khung loh kha a uiawm takzet.

"A nihna takah chuan chak lo mah ila hnualna tur a awm lo. Huaisen taka kan beih letna kha kan chhuang zawk tur a ni a, khelmual chhunga kan hna thawh dan ṭha tak hre reng chungin, kan inkhelh lehpek hun atan hmasawn nan kan hmang zawk tur a ni ang," tiin a sawi.

Montell naute hian La Liga match 31 khelh aṭangin point 46 an hmu tawh a, league table-ah pasarihna an ni mek. Season thara UCL khel leh tur chuan beiseina a tlem tawh a, Europa League khel tur pawhin chetsual a thiang tawh lo. Inrinni tlai dar 4:30 hian Villareal an mikhual zui leh dawn a ni.