Williams unau inlan dawn lo

Serena leh Venus Williams te chu Fed Cup semifinal-ah an inlan dawn lo. Nilaini zan khan US Tennis Association (USTA) chuan Williams unau inlan loh tur thu hi an tichiang a, Kathy Rinaldi chu captain a nih chhunzawm ang.

Ram leh ram hmeichhe tennis team hmanga inelna Fed Cup semifinal hi April 21-22 chhunga khelh tur niin, Netherlands hnehtu US hian France an lenchilh dawn a ni.

Grand Slam vawi 23 champion tawh Serena hi fa a neih hnuah a inkhel pangngai leh thei tawh. Mahse, Serena hian beisei a la phak lo, a unaunu Venus pawh a tournament khelh hnuhnung pahnih Indian Wells leh Miami Open-ah result ṭha a nei lo bawk.

Williams unau tel lohna US team-ah hian captain Kathy Rinaldi bakah US Open champion leh world number 9 ni bawk Sloane Stephens a awm a, world number 13 Madison Keys, CoCo Vandeweghe (16) leh doubles number 1 hlui Bethanie Mattek-Sands a awm bawk.

Semifinal lehlamah Germany chuan vawi 10 champion tawh Czech Republic chu Stuttgart-ah an mikhual thung ang. Germany tan world number 1 hlui Angelique Kerber bakah Julia Goerges te chu player langsar an ni dawn a, an khingpui tur lamah world number 6 Karolina Pliskova leh Wimbledon champion vawi hnih ni tawh Petra Kvitova te an awm bawk ang.