A hunah Ronaldo a inlar

Injury time minute sarihnaah Real Madrid jersey number 7 Cristiano Ronaldo chuan 'cool' takin Juventus goal kilah penalty a chhuih lut a, Los Blancos-in Champions League semifinal thlen nan an hmang. Santiago Bernabeu-ah Ronaldo chu player langsar a ni a, a goal khung lawmna atana a kawr hlipa a taksa phiar ṭha tak a pholan chu lehkhabu kawm a dah tlak a ni a, chutihrualin a chhungthu erawh a kawm aṭanga teh chi a ni lo.

Juventus-in an mualah goal thum zet phur mah se Real Madrid khelmualah first half-a Mario Mandzukic-a goal hnih leh second half-a Blaise Matuidi goal hmangin an chhang let a, aggregate-in 3-3 chiah a ni ta. AS Roma-in Barcelona laka thawnthu ropui an ziah hnu lawkah Italian club-in Spanish club lakah bawk thawnthu ngaihnawm bik an ziak leh dawn niin lang mah se English referee Michael Oliver a inrawlh hnuah Los Blancos an dingchang.

Referee Oliver hian minute 90-naah Real hi penalty a pe a, a thutlukna uar taka sawiseltu Gianluigi Buffon a hnawt chhuak zui a, Ronaldo-a'n hming ṭhatna atana a hman penalty vang hian Italian keeper-in Champions League nomawi a beiseina chu a tham ral!

Super Mario
Croatian striker Mario Mandzukic chuan second 76-na lekah goal a khung a, Real-in Champions League an muala an khelh ṭuma an chhuah ran ber ṭum a ni a. Sami Khedira cross ball duhthusam chu Mario-a'n a tauh lut.

Minute 37-naah Mandzukic-a'n a goal hnihna a khung a, Juventus forward hi Santiago Bernabeu-a Champions League inkhelah mikhual team tana first half-a goal hnih khung thei hmasa ber a ni.

Second half-ah pawh Italian club bawkin goal an khung hmasa a, Real keeper ball man fuh loh nang fuhin Blaise Matuidi chuan Juve goal thumna a khung. Heti hian minute 90 hi hmang zo se extra time khelh tur a ni ang.

Buai nuai nuaina
Medhi Benatia chuan minute 90-naah hnung lam aṭangin Real winger Lucas Vazquez chu ball chhuhsak a tum a, Spanish winger chuan remchangah lain ṭan luih hram tum loin penalty beiseiin a tlu thung.

Penalty a nih leh nih loh chu referee thutlukna a ni tawh a, English referee Olivier-a ngaihdanah chuan penalty a ni a, thuneihna kengkawhtu a nih bawk avangin Real Madrid tan chuan lawm taka pawm mai loh chu tih theih a awm lo.

Veteran keeper Gigi Buffon-a'n a lungawi lohna a lantirna lamah a ṭul bak a sawi avangin hnawhchhuah a ni a, keeper thlak nan hian Gonzalo Higuain chu lachhuakin Arsenal goalkeeper hlui Wojciech Szczesny chungah mawhphurhna hlan a ni.

Penalty pet thiam Ronaldo-a'n goal khung turin harsatna a nei lo a, goal khung ngaia nei tur khawpa goal khung tam tawh pawhin hetiang hun bikah chuan a insum thei lo. Tun dinhmuna thlen theihna tura a thawhrim zia hmuh theihna a taksa chu a pholang a, yellow card hmuh phah mah se a hlimna a tlakhniam phah lo.

Italian club tan goal khung belh ngaihna a awm tawh lo a, referee-in hun tawp ham rik zui avangin Real-in semifinal an lut.

Ballon d'Or kawltu
Ronaldo hian tun season-ah Ballon d'Or kawltu a nihna a pholang a, UCL match 11 a zawnin goal a khung tawh a. Ram leh club tan a match hnuhnung 14-ah goal 27 a khung a. Tun season-a match 28 a khelhah goal 41 a khung tawh a, Champions Legue match 150-ah goal 120 a khung a, a record thlirin kum 33 mi ni tawh mah se a statistics aṭanga thlir chuan a vanglai hun a la inṭan chauh niin a lang.

Chakna goal khungtu Ronaldo chuan, "Ka lung phu a rawn rang a, amaherawhchu a pawimawh zia ka hriatchian avangin ka rilru erawh a fim hle," tiin a goal khung chungchang a sawi.

Real an inhrosa
Real Madrid-in kum 2011 aṭang khan semifinal an la thleng ziah a, inelna hnuhnung pahnihah an champion tawh bawk. An chak takah chuan ṭawngkam an duhtui vek lo.

Real boss Zinedine Zidane chuan, "Ka hlau thawng lo, tlak ka hlau lo hrim hrim," tiin a sawi a. Brazilian defender Marcelo pawhin, "Barcelona laka thleng ang kha kan chungah a thlen a rem ve lo, keini chu Real Madrid kan ni," tiin an hmelma Barcelona a kâp tel hram.