Besei loh danin Gigi Buffon

Goalkeeper ropui Gianluigi Buffon-a'n kum 40 a tlin tawh avangin hun tam a nei tawh lo a, Real Madrid nena Thawhlehni zan kha a Champions League match hnuhnung ber a nih chuan nomawi ni loin red card hmu chungin Europe-a club inelna sang ber a mangṭha dawn tihna a ni.

Italian keeper Buffon chuan, "Thutlukna vawi 10 siam se, ṭum khat chu penalty a ni ve mahna. Minute 93-naa team beiseina zawng zawng tihtawp sak tura penalty pe tur chuan a chian viau a ṭul a ni. First leg-a penalty min pek lohna aṭanga thlir phei chuan penalty tur a ni lo. Kan theihna zawng zawng kan hlan a, inlehthal ropui lantir kan tum kha mihring pakhat thutlukna siam fuh loh vanga tawp tur a ni lo.

"Khatiang kha chuan a awmah pawh thinlung ni loin bawhhlawh hlawm a awm ka ring. Khelmuala huaisen taka thutlukna siam ngam lo chuan mipui ṭhutna aṭangin nupui fanau nen en mai tur a ni a. Kan hun tawn zawng zawng tichhe vektu lakah chuan eng ṭawngkam pawh ka hmang thei a, ani pawhin a pawi khawih nasat zia kha a hre ve tur a ni," tiin a lawm lo hle.

Buffon hi khelmual chhungah player pawimawh a la ni a, Santiago Bernabeu-ah pawh hian Isco leh Gareth Bale te goal khung tur ṭha takin a dang a, Real goal bawh a nat avangin Italian keeper hi a rim a, penalty ber a hmachhawh loh avangin goal a chhuah lo.

Juventus captain Buffon chuan, "Extra time tal chu kan phu a, chumi zawhah chuan engpawh a thleng thei a ni. Ka teammate-te hi ka ringtawk a, anni nen chuan engpawh kan thlentir thei ang," tiin a sawi a, ṭawmpuitu ṭhahnem tak nei mah se thil thlen dan a ni si lo.

Kum 12 liam ta khan tun ṭuma Real Madrid coach Zinedine Zidane chuan France jersey hain Gigi Buffon-a venah hian panenka penalty kick hmangin FIFA World Cup final-ah goal a khung a, amaherawhchu Zidane hi insum zawh loh vangin hnawhchhuah a ni a, Les Bleus-in an tawrh phah a, Buffon-a'n World Cup nomawi a chawi. Champions League-ah erawh French legend Zidane chu dinhmun ṭha zawkah a ding thung.